Áhugaljósmyndarinn Binni frá Ólafsfirði

Í dag verður opnuð sýning á ljósmyndum Brynjólfs Sveinssonar áhugaljósmyndara.

Brynjólfur var fæddur 1914 en lést árið 1981 og var hann gjarnan kallaður Binni.

Ljósmyndaáhuginn lét snemma á sér kræla og fór hann að taka myndir sextán ára gamall og talsvert af myndum birtust eftir hann í bókum, blöðum og tímaritum, fyrst árið 1933 þegar Binni var átján ára gamall.

Fjölskylda Binna stóð í tilefni af hundrað ára fæðingarafmæli hans fyrir sýningu á ljósmyndum og kvikmyndum hans í Ólafsfirði. Var það í fyrsta skipti sem úrval mynda hans var sýnt opinberlega.

Í dag verður opnuð sýning í Sjóminjasafninu með stórum hluta þeirra mynda sem sýndar voru á síðasta ári í Ólafsfirði.

Á ljósmyndum Brynjólfs má sjá athafnalífið við höfnina, sjómenn, fiskverkafólk og myndir af Ólafsfirðingum við sín daglegu störf, en einnig á hátíðar- og sorgarstundum.

Á sýningunni eru meðal annars myndir af skipsskaða á hvítasunnu árið 1935, vígslu sundlaugar Ólafsfjarðar árið 1945 og myndir sem hann tók í tengslum við flugslysið í Héðinsfirði árið 1947.

Ljósmyndasafn Binna er varðveitt á Minjasafni Akureyrar en sýningin verður opnuð sem fyrr segir í dag klukkan fimm í Hornsílinu í Sjóminjasafninu í Reykjavík.