Ef eitthvað er þá líður dóttir mín fyrir að ég sé í því sæti sem ég er

Einar Þór Bjarnason, formaður Skíðasambands Íslands, segir engar óeðlilegar ástæður liggja að baki því að Helga María Vilhjálmsdóttir fái ekki að keppa á Evrópumótaröðinni eins og faðir hennar, Vilhjálmur Ólafsson, kvartar yfir.

Skíðasambandið neitar henni um þátttökurétt þar sem hún hafi ekki náð tilskildum lágmörkum um þátttöku.

„Alpagreinanefnd og landsliðsþjálfari settu þessi viðmið fyrir að verða tveimur árum. Ef við berum okkur saman við aðrar þjóðir þá eru þessi viðmið alls ekki há,“ segir Einar og telur til nokkur lönd máli sínu til stuðnings en Vilhjálmur taldi til önnur lönd er hann studdi sitt mál.

„Ég veit við hvað hann er að miða en hann horfir á þetta svolítið með sínum augum. Ef ég ber okkur saman við Norðmenn, Hollendinga, Belga og fleiri þá teljast þetta vera allt of lág lágmörk. Aðalmálið í þessu er að það er tröppugangur í styrkleika móta. Ef við sendum keppendur sem hafa ekki náð lágmörkum þá er nokkuð gefið að árangurinn verður eftir því. Það er stærra og meira mál en lítur út fyrir að vera að taka þátt í þessum stóru mótaröðum. Þú hoppar ekki yfir þrep á leiðinni upp til þess að vera góður. Viðmiðin eru sett svo íþróttamaðurinn verði betri. Þetta er svona í fleiri íþróttagreinum.“

Einar formaður vill lítið gera úr þeirri gagnrýni Vilhjálms að verið sé að halda aftur af Helgu.

„Það er alls ekki þannig. Það er verið að bjóða henni upp á mót þar sem hún getur náð árangri og bætt sig. Þar af leiðandi getur hún orðið betri skíðamaður,“ segir Einar og bætir við að það geri íþróttamanni ekki gott að taka eingöngu þátt í stærri mótum þar sem árangur næst ekki.

Formaðurinn segir að landsliðsfólkið verði að ná betri árangri á minni mótum áður en lengra er haldið.

„Krakkarnir hafa skíðað ágætlega á þessum mótum sem Vilhjálmur segir ekki vera nógu góð en þau skila sér ekki alltaf í topp þrjú sætin en eru þó byrjuð að klóra í þau sem er jákvætt. Við viljum sjá þau læra að höndla að vera á meðal þeirra bestu á ákveðnu þrepi áður en haldið er áfram upp stigann.“

Einar blæs einnig á gagnrýni Vilhjálms um Fjalar landsliðsþjálfara.

„Hann er mjög öflugur og duglegur. Það ber að líta á að þarna er foreldri að setja fram sínar skoðanir og gagnrýni. Við virðum það en við höfum fulla trú á okkar þjálfara og það hefur sýnt sig að keppendunum hefur farið fram. Við skiljum ekki alveg af hverju Vilhjálmur vill fara þessa leið og sleppa þrepum. Við teljum Helgu geta náð árangri í þeim farvegi sem hún er í núna. Við viljum sjá að henni gangi vel.“

Vilhjálmur sakar Einar um að láta persónuleg sjónarmið ráða för er hann neitar Helgu um að fara á Evrópumótaröðina. Hann vilji ekki sjá hana taka of langt fram úr dóttur formannsins.

„Ef eitthvað er þá líður dóttir mín fyrir að ég sé í því sæti sem ég er. Það er ekki ég sem vel landsliðsverkefnin eða set viðmiðin. Helga hefur fengið öll sömu tækifæri og aðrir í landsliðshópnum. Þetta er nú eiginlega ekki svaravert enda erum við mjög ánægðir með Helgu og hvernig hún er að standa sig,“ segir Einar Þór Bjarnason.