Fannst Arnarhóll of fjarri miðbænum fyrir Alþingishús

„Það er árlegur viðburður hjá okkur sagnfræðingum að setjast niður þegar jólabókaflóðinu hefur slotað og ræða nokkrar vel valdar bækur um liðna tíð,“ segir Guðni Th. Jóhannesson sagnfræðingur um bókafund sem haldinn er í kvöld í Þórunnartúni 2.

Annars vegar verður ævisöguþema. „Við völdum bók Gísla Pálssonar um Hans Jónatan og ættarsögudrama Helgu Guðrúnar Johnson, Saga þeirra, saga mín. Höfundarnir stóðu báðir frammi fyrir ögrandi vandamálum,“ segir Guðni Th.

Hins vegar verður fjallað um Reykjavík, meðal annars þá sýn á borgarsöguna sem birtist í bókinni Reykjavík sem ekki varð eftir Önnu Dröfn Ágústsdóttur og Guðna Valberg.

„Við fáum þar sterkt á tilfinninguna hvað uppbygging er mikið happa- og glappadæmi,“ segir Guðni Th. „Alþingishúsið er meðal annars þar sem það er núna af því Arnarhóll þótti of langt frá miðbænum fyrir húsið og landshöfðinginn þurfti hólinn sem beitiland.“

Í bók Eggerts Þórs Bernharðssonar heitins, Sveitin í sálinni, koma líka sjónarmið fram sem þykja undarleg nú að sögn Guðna Th.

„Árið 1947 var sagt að Langholtshverfið og Vogarnir yrðu aldrei hluti af Reykjavík, það væri of fjarlægt. Dæmi um hvað menn sjá skammt inn í framtíðina.“ Allir eru velkomnir á fundinn sem hefst klukkan 20. Aðgangur er ókeypis.