Hugarflug og skýjaborgir

„Myndirnar á sýningunni bera ekki nöfn. Þær eru eiginlega hugarflug þar sem gætir áhrifa náttúrunnar allt í kringum okkur, en ekki síst hinnar einstöku fegurðar sem ríkir í Álftafirði vestra og þar í kring, við Ísafjarðardjúp. Þetta eru samt ekki landslagsmyndir heldur frekar skýjaborgir,“ segir Bergljót Svanhildur Sveinsdóttir sem sýnir í sal Íslenskrar grafíkur að Tryggvagötu 17, gengið inn hafnarmegin.

Spurð hvort hún sé vestan af fjörðum svarar Bergljót: „Ég fæddist reyndar í Reykjavík en ég hef verið mikið fyrir vestan og tengist þeim landshluta sterkt. Þar erum við mikið á sumrin, hjónin.“

Þetta er tólfta einkasýning Bergljótar. Hún er opin fimmtudaga til sunnudaga milli klukkan 14 og 18 og síðasti sýningardagur er 22. mars.