Leikandi á norsku

Norski leikhópurinn Jo Strømgren Kompani sýnir þrjú verk í Reykjavík og á Akureyri nú á næstu dögum. Ívar Örn Sverrisson leikur aðalhlutverk í tveimur þeirra og stígur nú á svið í fyrsta sinnsíðan hann flutti til Noregs fyrir fimm árum.

„Við konan mín Arna Ösp Guðbrandsdóttir, tókum upp á því að flytja til Noregs fyrir fimm árum með börnin okkar tvö, þar sem hún þurfti að klára sitt nám í arkitektúr. Fyrir mig sem leikara þá var þetta svona dálítil brekka vegna tungumálsins því menntaskóladanskan dugði nú ekki til þess að fá vinnu sem leikari. Þannig að ég var fyrst um sinn að vinna á kaffihúsum en svo kom fyrsta tækifærið eftir bara hálfs árs veru og ég var rosalega ánægður með það. Síðan þá hefur þetta bara verið að vaxa og dafna og í dag hef ég nóg að gera í mínu fagi.“

Ívar Örn vinnur talsvert mikið innan leikhóps Jo Strømgrem en hann er stór stjarna í norsku menningarlífi sem og evrópskum nútímadansheimi. „Jo Strømgren kemur í raun úr dansheiminum en hefur einnig mikinn áhuga á leikhúsi og vinnur þar í auknum mæli. Það hentar mér mjög vel þar sem ég á talsverðar rætur í dansleikhúsi og hef lengi haft áhuga á dansi. Nýtti mér dans sem hreyfingu þegar ég var í leiklistarskólanum og það svona þróaðist í þá átt.

Ein af sýningunum sem við komum með er reyndar hreinræktuð danssýning en ég tek ekki þátt í henni. Sýningin kallast Fjörutíu og er í samvinnu við Pólska dansleikhúsið og er unnin í tilefni af fertugsafmæli þeirra. Þessi sýning verður sýnd í Borgarleikhúsinu þann 18. maí og ég hvet fólk til þess að drífa sig.

Sýningarnar sem ég er í eru hins vegar frekar ólíkar. The Border er í grunninn leikverk sem blandað hefur verið með dansi þegar persónurnar þrýtur orð til að tjá tilfinningar sínar og ástand. Skemmtileg blanda af leikhúsi og dansi sem Jo Strømgren hefur þróað í áraraðir.

En hin sýningin kallast Eldhúsið og er ætluð börnum á aldrinum fjögurra til tólf ára. Fólk á öllum aldri getur þó skemmt sér þar sem húmorinn er lúmskur.

Við höfum unnið að ákveðinni aðlögun fyrir Ísland sem á eftir að koma í ljós þegar þar að kemur svo ég held að fólk þurfi vonandi ekki að hafa miklar áhyggjur af tungumálahindrunum. Þetta verður bara gaman.“ 

The Border verður þann 18. og 19. maí kl. 20 og Eldhúsið þann 23. maí kl. 14 og verða báðar þessar sýningar í Tjarnarbíói.