Spieth og McIlroy mætast í Abu Dhabi

Það má vera að verðlaunaféð á Abu Dhabi meistaramótinu sé ekki jafn veglegt og á venjulegu móti á PGA-mótaröðinni en það er eitthvað við það sem dregur bestu kylfinga heims að sér.

Rory McIrloy, Rickie Fowler, Henrik Stenson og besti kylfingur heims, Jordan Spieth, eru allir meðal þátttakenda en mótið sem er hluti af Evrópumótaröðinni hefst á morgun.

Fowler, Spieth og McIilroy eru allir saman í holli fyrstu tvo hringina og golfáhugamenn um víða veröld eru eflaust spenntir að sjá fyrsta einvígi McIlroy og Spieth á árinu en þeir tveir eiga eflaust eftir að berjast um marga stóra titla í náinni framtíð.

Á meðan að Evrópumótaröðin stoppar í Abu Dhabi fer Career Building Challenge mótið fram á PGA-mótaröðinni þar sem margir sterkir kylfingar eru einnig skráðir til leiks.

Bæði mótin verða í beinni útsendingu yfir næstu fjóra daga á Golfstöðinni en útsendingartíma má sjá hér.