Range Rover Holland & Holland

Range Rover bílar eru miklir lúxusgripir en svo þykir sumum að enn betur megi gera og breytir þeim í enn íburðarmeiri bíla. Einn þeirra er skotvopnaframleiðandinn Holland & Holland sem framleiðir hágæða skotvopn fyrir þá efnameiri.

Land Rover sem framleiðir Range Rover bíla hefur í samstarfi við Holland & Holland framleitt sérstaka útgáfu Range Rover sem ber nafn Holland & Holland og er hún ætluð efnameiri kaupendum. Þessi útgáfa mun aðeins fást í einum lit sem er einkennislitur Holland & Holland, þ.e. djúpgrænn.

Aðrar breytingar að utan eru litlar en það á ekki við innanrýmið, líkt og sést á meðfylgjandi myndum. Franskur valhnetuviður sem Holland & Holland notar mikið í riffla sína er mjög áberandi í innanrýminu. Sérstakt leður sem sagt er í espresso lit er síðan á sætunum og víðar í innréttingunni.

Hurðaopnararnir að innan eru úr ígröfnu stáli í sama stíl og á byssum Holland & Holland. Víða er að finna merkingar Holland & Holland í innréttingunni, neðst í hurðaopum bílsins, á mælaborðinu, á sætunum og víðar. Sérsmíðuð riffilgeymsla er aftur í farangursrými jeppans ætluð fyrir tvo riffla og dregst hún aftur á sleða.

Víst er að fasanar í Bretlandi ættu að forða sér ef þeir sjá Range Rover í þessum lit á næstunni. Verðið á þessari sérútgáfu Range Rover er litlar 32 milljónir króna. Range Rover ætlar að selja 30 svona bíla í Bandaríkjunum og mun einnig takmarka framleiðsluna fyrir aðra markaði.