Alvarlegt slys í Þjóðleikhúsinu: „Þetta var mér að kenna“

Vigdís Hrefna Pálsdóttir er ristarbrotin á vinstri fæti og með tvöfalt hælbrot á hægri fæti eftir hátt fall á stóra sviðinu fyrir framan fjölmennan sal á lokaæfingu í Þjóðleikhúsinu í gærkvöldi. Vigdís Hrefna var á bráðadeild Landspítalans að bíða eftir fundi með bæklunarlækni þegar Vísir náði af henni tali í morgun.

„Ég er að bíða eftir lækninum til að fá að vita hvort ég sé að fara í aðgerð,“ segir Vigdís Hrefna sem átti að fara með aðalhlutverkið í sýningunni Hleyptu þeim rétta inn sem frumsýna átti annað kvöld, fimmtudagskvöld. Ljóst er að ekkert verður af frumsýningunni.

Um er að ræða vampírudrama þar sem Vigdís Hrefna fer með hlutverk tólf ára vampíru.

Óhuggulegt að sjá þetta

Vigdís Hrefna segist vel muna eftir slysinu í gær. Hún hafi haldið í efsta hluta leikmyndarinnar í nokkurra metra hæð og verið að færa til hendurnar, með myrru á höndunum til að auka gripið, þegar hún féll. Vigdís var ekki í línu en vill ekki meina að öryggisatriðum hafi verið ábótavant. 

„Þetta var mér að kenna,“ segir Vigdís Hrefna. Hún segir sem betur fer vera í lagi með höfuðið. „Eins langt og það nær,“ segir hún og grínast. Ljóst sé að þátttöku hennar í leikritinu sé lokið, í bili að minnsta kosti.

„Ég er enn að reyna að átta mig á þessu,“ segir Vigdís.

Ari Matthíasson Þjóðleikhússtjóri sagði í viðtali í Bítinu í morgun að fjölmenni hefði orðið vitni að slysinu.

„Það var nánast fullt hús af fólki og það er óhuggulegt að sjá þetta,“ segir Ari. „Fólk í salnum veit ekkert hvað hefur gerst þegar dregið er fyrir og sér fyrir sér mikið alvarlegra slys en í raun varð, sem betur fer.“

Velta fyrir sér að fresta fram á haust

Tveir læknar voru meðal áhorfenda og önnuðust Vigdísi þar til að sjúkrabíll mætti á svæðið.

„Hún hefur það eftir atvikum gott. Eins gott og maður getur haft það þegar maður er búinn að brjóta á sér lappirnar.“

Ljóst er að ekkert verður af frumsýningu leikritsins og óvíst hvert framhaldið verði.

„Við erum að athuga hvað við gerum, hvort við frestum og setjum inn nýja leikkonu eða hvort við frestum þessu bara til haustsins. Því Vigdís Hrefna er alveg stórkostleg í þessu og er aðalleikonan og andlit sýningarinnar.“

Ari segir mikla vinnu hafa verið lagða í að tryggja öryggi leikaranna í sýningunni. Sérstakur þjálfari hafi til að mynda verið fenginn til að kenna leikurunum klifur og Vigdís hafi gert þetta margoft áður en slysið átti sér stað. ​

Að neðan má sjá innslag Íslands í dag frá því á mánudagskvöld þegar tekið var hús á leikstjóranum Selmu Björnsdóttur og öðrum þátttakendum í Hleyptu þeim rétta inn.