Andlega hliðin er ekki í lagi

Rory McIlroy er í vandræðum með að endurheimta formið sem kom honum á topp golfheimsins.

Hann tók þátt á Arnold Palmer boðsmótinu á Bay Hill en endaði í 27. sæti. Hann átti þó aldrei þessu vant góðan lokadag þar sem hann kom í hús á 65 höggum.

Golfið var þó mjög kaflaskipt hjá honum. Hann átti margar góðar holur en jafn margar slæmar. Hann fékk sex tvöfalda skolla og þar af þrjá á laugardeginum.

„Þetta var saga vikunnar og í raun saga ársins hjá mér,“ sagði McIlroy. „Ég spila frábært golf og svo lélegt golf. Ég er að gera allt of mikið af mistökum.“

Norður-Írinn viðurkennir að þetta sé allt í hausnum á honum.

„Ég er með allt til staðar og tæknin er nákvæmlega eins og hún á að vera. Ég er að pirra mig allt of mikið á mistökunum og kemst ekki yfir það. Það hefur svo áhrif á næstu holur.“