Umfjöllun, viðtöl og myndir: Grótta - Stjarnan 20-22 | Stjarnan hélt lífi í titilvonum sínum

Stjarnan lagði Gróttu 22-20 í þriðja leik liðanna í úrslitum Olís deildar kvenna í handbolta á útivelli í kvöld. Stjarnan minnkaði muninn í einvíginu í 2-1.

Anton Brink , ljósmyndari Vísis og Fréttablaðsins, var á leiknum í kvöld og náði þessum skemmtilegu myndum hér fyrir ofan.

Grótta gat tryggt sér Íslandsmeistaratitilinn annað árið í röð en Stjarnan hélt lífi í einvíginu og þurfa liðin að mætast í fjórða sinn í TM höllinni í Garðabæ á sunnudaginn.

Íris Björk Símonardóttir markvörður Gróttu varði þrjú fyrstu skot Stjörnunnar í leiknum en gestirnir létu það ekki slá sig útaf laginu. Stjarnan mætti mjög ákveðin til leiks og gekk nokkuð vel að skora framan af leik.

Stjarnan náði mest tveggja marka forystu í fyrri hálfleik en með góða vörn sem sitt sterkasta vopn náði Grótta að jafna og var staðan í hálfleik 11-11.

Grótta skoraði fyrsta mark seinni hálfleiks en varnarleikur Stjörnunnar í seinni hálfleik var frábær. Grótta skoraði aðeins 5 mörk fyrstu 25 mínúturnar og kom klaufagangur Stjörnunnar í dauðafærum í raun í veg fyrir að liðið gerði út um leikinn fyrir loka mínúturnar.

Stjarnan komst fjórum mörkum yfir þegar fjórar og hálf mínúta var eftir en Grótta skoraði þá þrjú mörk á tveimur mínútum og opnaði leikinn upp á gátt.

Grótta fékk sókn til að jafna metin en líkt og svo oft í seinni hálfleiknum misstu leikmenn liðsins boltann og Stjarnan nýtti sér það með að gera út um leikinn.

Grótta virtist hreinlega fara á taugum í seinni hálfleik þegar liðið lenti í vandræðum með vörn Stjörnunnar. Liðið átti bæði erfitt með að skapa sér færi og missti boltann marg oft sem skilaði Stjörnunni mörkum úr hröðum upphlaupum.

Helena Rut Örvarsdóttir var mjög áræðin í liði Stjörnunnar að vanda og óhrædd við að taka á skarið. Leikmann til að taka á skarið sár vantaði hjá Gróttu í leiknum.

Florentina Stanciu er enn meidd hjá Stjörnunni en Heiða Ingólfsdóttir stóð vel fyrir sínu í markinu og hélt í við Írisi Björk í marki Gróttu.

Liðin mætast í Garðabæ á sunnudaginn en þar vann Grótta auðveldan sigur í öðrum leiknum. Stjarnan svaraði því vel í kvöld og opnaði í raun einvígið upp á gátt.

Frábær mæting var í Hertz höllinni í kvöld. Heimamenn ætluðu að styðja lið sitt til sigurs en mjög góð stemning var í húsinu.

Halldór Harri: Ætluðum ekki að láta sópa okkur út

„Við ætluðum ekki að láta sópa okkur út í þessari úrslitakeppni og keyrðum allt af krafti og það skilaði sér í sigri,“ sagði Halldór Harri Kristjánsson þjálfari Stjörnunnar.

Íris Björk Símonardóttir var Stjörnunni mjög erfið í tveimur fyrstu leikjunum og byrjaði á því að verja þrjú fyrstu skot Stjörnunnar í leiknum. En ólíkt öðrum leiknum þá lét Stjarnan ekki slá sig útaf laginu í kvöld.

„Það var barátta og kraftur í okkur í kvöld og þó Íris sé góð hér í kvöld þá létum við það ekki á okkur fá og brotnuðum ekki niður eins og síðast.

„Það var kannski ágætt að þennan skell í síðasta leik og fá hann stóran. Fólk var búið að afskrifa okkur og við ætluðum að sýna og sanna að það sé ekki rétt og ber að hrósa stelpunum fyrir það,“ sagði Harri.

Stjarnan vann Gróttu í bikarúrslitaleiknum fyrr á tímabilinu og minnti leikurinn í kvöld og þá ekki síst seinni hálfleikurinn á þann leik þar sem Stjarnan lék stórbrotna vörn.

„Vörnin var virkilega góð og Heiðar (Ingólfsdóttir) tók mikilvæga bolta. Þetta er það sem við þurfum að fá. Við vitum að í þessum leikjum og líka í leikjunum gegn Haukum að við þurfum að halda þeim í kringum 20 mörkin, þá eigum við séns og við gerðum það í kvöld.“

Florentina Stanciu lék ekki með Stjörnunni í kvöld og vildi Harri lítið gefa upp um hvort möguleiki væri á því að hún gæti leikið með liðinu á sunnudaginn.

„Maður veit aldrei. Það veltur svolítið á henni, hvernig henni líður og hvort hún sé tilbúin. Heiða er annars góð og ég hef engar áhyggjur af því,“ sagði Harri að lokum.

Þórhildur: Lykilatriði að spila góða vörn

Þórhildur Gunnarsdóttir skoraði mikilvæg mörk fyrir Stjörnuna í sigrinum gegn Gróttu í kvöld en hún líkt og liðsfélagar sínir höfðu engan áhuga á að fara strax í sumarfrí.

„Okkur langaði ekki í frí. Það er ekki í boði strax,“ sagði Þórhildur eftir leikinn í kvöld.

„Við mættum til leiks, annað en í síðasta leik og þá getum við verið kraftmiklar. Við vorum mjög áræðnar í kvöld og ég held að það hafi skilað okkur sigrinum.“

Stjarnan lék frábæran varnarleik í seinni hálfleik, ekki ósvipað og liðið gerði þegar það tryggði sér bikarmeistaratitilinn fyrr á leiktíðinni í úrslitum gegn Gróttu.

„Það er algjört lykilatriði að spila góða vörn. Þá kemur markmaðurinn með og við fáum þessi einföldu mörk úr hraðaupphlaupum.

„Það sýnir sig að þegar við mætum þá getum við verið virkilega góðar.

„Okkur líður vel hér. Við ætlum okkur að koma hingað á miðvikudaginn í oddaleik,“ sagði Þórhildur að lokum en liðin mætast í fjórða leiknum í Garðabæ á sunnudaginn þar sem Stjarnan þarf sigur til að tryggja sér oddaleik.

Kári: Getum alveg unnið titilinn aftur í Mýrinni

Kári Garðarsson, þjálfari Gróttu, var ekki sáttur með sóknarleik síns liðs í tapinu fyrir Stjörnunni í kvöld.

„Við vorum í veseni í sóknarleiknum allan seinni hálfleikinn, gerum ótrúlega mikið af einföldum mistökum og missum boltann frá okkur,“ sagði Kári en Grótta tapaði boltanum 11 sinnum á síðustu 21 mínútu seinni hálfleiks.

„Þær refsuðu okkur mikið með hraðaupphlaupum í dag sem var ansi dýrkeypt.“

Grótta gat tryggt sér Íslandsmeistaratitilinn með sigri í kvöld og farið þar með taplaust í gegnum úrslitakeppnina. En fannst Kára spennustig leikmanna Gróttu of hátt í leiknum í kvöld?

„Ég veit það ekki. Ég tek ekkert af Stjörnunni, þær voru grimmar og grimmari en við á ýmsum sviðum. Við spiluðum sterkan varnarleik og fengum fullt af hraðaupphlaupum í fyrstu tveimur leikjunum en ekki í dag.

„Svo var þéttleikinn í vörninni ekki til staðar, við brutum ekki nógu vel á þeim,“ sagði Kári.

Þrátt fyrir tapið í dag fær Grótta tvo möguleika í viðbót til að tryggja sér titilinn sem liðið vann í fyrra.

„Það eru ýmsir þættir sem við þurfum að fínpússa fyrir sunnudaginn. Nú er ekkert annað að gera en að þétta raðirnar, nýta kvöldið til undirbúnings og svo er æfing á morgun. Við unnum titilinn í Mýrinni í fyrra og við getum alveg tekið upp á því aftur á sunnudaginn,“ sagði þjálfarinn að endingu.