Alvarlegt umferðarslys nærri Hellu og þjóðveginum lokað

Einn var fluttur alvarlega slasaður með þyrlu Landhelgisgæslunnar eftir bílveltu nærri söluskálanum við Landvegamót á Hellu.

Slysið átti sér stað á öðrum tímanum í dag en þrjú voru í bílnum, tveir karlmenn og ein kona, öll á þrítugsaldri.

Samkvæmt upplýsingum frá Brunavörnum Rangárvallasýslu voru hinir tveir farþegar bílsins fluttir með sjúkrabílum á Landspítalann en meiðsli þeirra voru talin minna alvarleg.

Samkvæmt upplýsingum frá Landspítalanum er sá sem fluttur var með þyrlunni kominn á gjörgæslu eftir slysið en hinir tveir farþegar bílsins eru í rannsóknum á bráðamóttöku spítalans.

Lögregla lokaði fyrir umferð um þjóðveginn á meðan viðbragðsaðilar athöfnuðu sig á vettvangi en fjölmennt lið lögreglu og sjúkraflutninga var kallað út. Samkvæmt upplýsingum frá lögreglunni á Suðurlandi er þjóðvegurinn enn lokaður.

Uppfært klukkan 15.

Lögreglan á Suðurlandi sendi frá sér tilkynningu vegna slyssins.

Uppfært klukkan 15.30 með upplýsingum frá Landspítalanum.