Spieth vann á heimavelli í fyrsta sinn

Bandaríkjamaðurinn Jordan Spieth fagnaði sigri á Colonial National-boðsmótinu í Texas í gær sem er hluti af PGA-mótaröðinni.

Þessi 22 ára gamli kylfingur, sem er annar á heimslistanum, fór lokahringinn á sex höggum undir pari en hann endaði í heildina á 17 höggum undir pari og vann með þriggja högga forskoti.

Harry English varð í öðru sæti á fjórtán höggum undir pari og þeir Ryan Palmer og Webb Simpson deildu þriðja til fjórða sæti á þrettán höggum undir pari. Bandaríkjamenn röðuðu sér í sex efstu sætin.

Þetta var áttundi PGA-sigur Spieths á ferlinum og sá fyrsti sem hann vinnur í sínu heimaríki, Texas. „Það var gott að ná þessum áfanga og vinna fyrir framan mitt fólk. Þvílík vika,“ sagði sigurreifur Jordan Spieth eftir mótið.

Spieth var með aðeins eins höggs forskot fyrir lokahringinn og missti forskotið snemma dags. Hann var búinn að jafna metin á fyrri níu og setti svo sex fugla á seinni níu og tryggði sér sigurinn.

Hann er yngsti sigurvegarinn á þessu móti í 86 ár.