NFL-leikmaður skotinn í fótinn

Varnarmaðurinn Aqib Talib komst í hann krappann á skemmtistað í Dallas í Bandaríkjunum um helgina er hann hlaut skotsár á fæti.

Talib mun hafa verið í hópi nokkurra sem særðust í skotárás sem átti sér stað aðfaranótt sunnudags.

Samkvæmt tíðindum sem bárust seint í gærkvöldi er búist við því að Talib muni ná sér að fullu og að þetta muni ekki hafa mikil áhrif á feril hans í NFL-deildinni.

Talib átti frábært tímabil á síðustu leiktíð og vann Super Bowl með Denver Broncos. Hann hefur áður komist í kast við lögin en hann var ákærður fyrir líkamsárás árið 2011 en málið féll niður vegna ónægra sönnunargagna.

Þá hefur hann áður verið dæmdur í nokkurra vikna keppnisbann fyrir að nota ólögleg lyf.