Heitasta flík sumarsins: Íslenska landsliðstreyjan

Það eru fáar flíkur sem eru jafn áberandi um þessar mundir og íslenska landsliðstreyjan. Þrátt fyrir að þær seldust upp fyrir nokkrum vikum þá getur fólk bætt það upp með því að klæðast gömlum treyjum eða einfaldlega bláum bolum eða peysum. 

Þegar myndavélin rennur yfir stúkuna á leikvöngunum í Frakklandi er alltaf jafn magnað að sjá bláa litinn skera sig úr. Fólk er þó ekki aðeins að klæðast treyjunum í Frakklandi heldur eru heimakærir Íslendingar einnig að klæða sig upp í hana ýmist í vinnunni, heima hjá sér eða með vinum og vandamönnum. 

Það er þó engum blöðum um það að fletta að Íslendingar taka sig svo sannarlega vel út í treyjunni og eru eflaust margir sem bíða eftir nýrri sendingu af treyjunni til þess að eignast eftir þetta stórkostlega mót.