17 stórlaxar á land fyrsta daginn í Víðidalsá

Veiðimenn sem eiga bókaða daga í Víðidalsá í sumar bíða spenntir eftir fréttum frá opnunardeginum í gær og verða líklega glaðir með fyrstu fréttir.

Fyrirsögn þessarar fréttir hefði líklega getað verið "Enn ein glæsileg opnunin" enda hafa veiðifréttir úr opnunum laxveiðiánna verið góðar og hvert metið á fætur öðru verið slegið.  Víðidalsá er enn ein áin sem á glæsilega opnun og það sem gerði þennan opnunardag jafn góðan og raun bar vitni, fyrir utan góða veiðitölu, er stærðin á löxum sem tókst að landa.

17 laxar veiddust í ánni á fyrstu vakt og var það allt fallegur stórlax 80-93 sm og það sáust fleiri laxar í þessum stærðarflokki um alla á.  Efasemdarmenn um Veitt og sleppt hafa verið óvenju hljóðir í sumar en það er full trú flestra veiðimanna að með aukinni sleppingu hækki meðalþyngdin í ánni og þó það taki oft nokkurn tíma að sjá árangurinn er hann þegar orðinn sýnilegur í mörgum ám og þar á meðal Víðidalsá.  Nú er beðið eftir næstu opnunum og væntanlega þeim síðustu og það er óhætt að segja að væntingarstuðullinn sé kominn upp úr þakinu.