Allt sem þú þarft að vita til að komast til Nice

Aðsókn í flugferðir frá Íslandi til Nice í Frakklandi um helgina hefur snaraukist frá því að Suðurnesjamaðurinn Arnór Ingvi Traustason skoraði sigurmark á síðustu mínútu í leik Íslands og Austurríkis á Evrópumóti karla í knattspyrnu í gær. Markið tryggði Íslandi leik gegn Englandi í sextán liða úrslitum sem fram fer í Nice næsta mánudag.

Wow air er eina íslenska flugfélagið sem flýgur til frönsku strandborgarinnar að staðaldri. Að sögn Svanhvítar Friðriksdóttur, upplýsingafulltrúa Wow, eru örfáir miðar eftir í flugið til Nice síðdegis á sunnudeginum og flugfélagið vinnur í því að bæta við flugferð sem færi á sunnudagsmorgninum.

„Það seldist mjög fljótt upp í flugið á sunnudaginn eftir leikinn en það er semsagt búið að stækka þessa vél núna,“ segir Svanhvít. „Þannig að það eru einhver sæti laus til sölu. Það selst sjálfsagt líka mjög fljótt upp.“

Svanhvít segist ekki geta sagt til um það að svo stöddu hvenær hægt verði að kaupa miða í flugið á sunnudagsmorgninum. Hún minnir á að Wow flýgur einnig reglulega til Parísar og Lyon í Frakklandi.

Ferðaskrifstofan Heimsferðir hefur einnig komið beinu flugi til Nice í sölu. Flogið verður út að morgni sunnudags og heim til Íslands um hádegi á þriðjudag.

Þá er Icelandair sömuleiðis að skoða möguleikann á því að bjóða upp á beint flug til Nice á næstu dögum eftir fjölmargar fyrirspurnir. 

Guðjón Arngrímsson, upplýsingafulltrúi Icelandair, segir að flugfélagið muni láta vita af því um leið ef það reynist mögulegt að bjóða upp á beint flug en minnir þó einnig á ferðir flugfélagsins til Parísar, Lundúna og fleiri borga þaðan sem hægt er að koma sér áfram til Nice.

Það kostar vissulega sitt að stökkva til Frakklands, vinsælasta ferðamannalands heims, með örfárra daga fyrirvara um hásumar á meðan stærsta knattspyrnumót sumarsins stendur yfir. Þannig varð veruleg hækkun á miðaverði í flugferð Wow til Nice áður en það seldist upp og gerðu sumir athugasemd við það á Facebook-síðu fyrirtækisins.

Sparsamir knattspyrnuáhangendur gætu þannig ef til vill frekar hugsað sér að púsla saman flugferð með ferðasíðum á borð við hina íslensku Dohop eða flugferðaleit Google þar sem fljótlega má finna ferðir fram og til baka á undir fimmtíu þúsund krónum, sé millilent í til dæmis Vín, Genf, München og svo framvegis.

Þór Bæring, framkvæmdastjóri Gaman Ferða, var gestur útvarpsþáttarins Brennslunnar í morgun en þar sagði hann vefsíðu fyrirtækisins hafa hrunið í gær vegna mikils álags frá fótboltaþyrstum Íslendingum. 

Allianz Riviera-leikvangurinn í Nice, þar sem leikmenn á borð við hinn fima Hatem Ben Arfa leika reglulega listir sínar, tekur aðeins um 35 þúsund manns í sæti. Benti Þór á að enginn tiltekinn miðafjöldi er eyrnamerktur Íslendingum, líkt og er í riðlakeppninni. Hin einfalda regla „Fyrstir koma, fyrstir fá“ verður í gildi þegar miðasalan hefst.

Miðasalan hefst á heimasíðu Knattspyrnusambands Evrópu á hádegi í dag en „röð“ fyrir miðasöluna opnar kortéri fyrr.