Forsetaáskorun Vísis: Missti af tækifæri til að rannsaka kyrkislöngur í Venesúela

Andri Snær Magnason, rithöfundur og frambjóðandi til embættis forseta Íslands, á hund sem sem er næstum því köttur en líkist blöndu af kengúru og hlébarða. Hann hefur aldrei verið tekinn af lögreglunni á Pajero jeppanum sínum. Leikarinn Alexander Skarsgard myndi leika hann í bíómynd um ævi hans. Þetta og fleira kemur fram hér að neðan í svörum Andra Snæs við Forsetaáskorun Vísis.

Vísir leggur mikið upp úr því að umfjöllunin um forsetakosningarnar sé ítarleg og úr öllum áttum, líka skemmtileg. Því lögðum við fyrir alla forsetaframbjóðendur skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Vísir mun birta svörin nú í vikunni fyrir kosningarnar sem fram fara 25. júní. Andri Snær Magnason er annar í röðinni.

Hver er fallegasti staðurinn á Íslandi?

Ásbyrgi.

Hundar eða kettir?

Hundurinn minn heitir Tromma, hún er næstum því köttur en líkist helst blöndu af kengúru og hlébarða.

Hver er stærsta stundin í lífi þínu?

Þegar börnin okkar fæddust.

Hver er uppáhaldsmaturinn þinn?

Sushi.

Hvernig bíl ekur þú?

Ég á 10 ára gamlan Pajero jeppa.

Besta minningin?

Þegar ég horfði í augun á ungri stúlku sem gekk út um dyrnar á kaffistofu Rafmagnsveitu Reykjavíkur í Elliðaárdal.

Hefur þú verið tekinn af lögreglunni?

Nei, ég hef aldrei verið tekinn eða handtekinn. Hef verið stoppaður í rútínutékki.

Hverju sérðu mest eftir?

John móðurbróðir minn var sérfræðingur í skriðdýrum, hann bauð mér að fara með sér til Venezuela að rannsaka Anaconda kyrkislöngur. Ég ætlaði alltaf síðar en hann dó svo úr malaríu. Ég lærði að maður á að nýta tækifærin þegar þau gefast.

Reykir þú?

Aldrei reykt, pabbi er lungnasérfræðingur og ég ólst upp á Hófítímanum. Það var mjög heilbrigður tími.

Uppáhalds drykkur(áfengur)?

Af einhverjum ástæðum finnst mér áfengi sjaldan bragðgott, eitthvað í bragðlaukunum. Fékk góðan bjór um daginn sem var bruggaður í Vestmannaeyjum. Sölvi heitir hann.

Uppáhalds bíómynd?

Rokk í Reykjavík.

Uppáhalds tónlistarmaður?

Í kvöld er það Thom Yorke.

Hvaða lag kemur þér í gírinn?

What else is there, Trentemöller remix af Roysopp ft The Knife.

Draumaferðalagið?

Mig langar að sigla upp Amazon fljótið.

Hefur þú migið í saltan sjó?

Hef laumast í sjósundi.

Hvað er það skrýtnasta sem þú hefur gert?

Ég skrifaði ljóð sem ungfrú Ísland las af stóra stökkpallinum í Sundhöllinni. Gjörningur fyrir Unglist c.a 1996. Ég held að það hafi verið Ragnar Kjartansson sem átti hugmyndina.

Hefur þú viðurkennt mistök?

Já og beðist afsökunar.

Hverju ertu stoltastur af?

Sögunni af Bláa hnettinum.

Rómantískasta augnablik í lífinu?

Þegar ég sá Möggu koma út um dyrnar á kaffistofu Rafmagnsveitunnar í Elliðaárdal.

Trúir þú á líf eftir dauðann?

Ég vil lifa til fulls fyrir dauðann. Hitt kemur í ljós.

Ef það væri gerð Hollywood kvikmynd um ævi þína, hver ætti að leika þig?

Alexander Skarsgaard.