122 stórlaxar á fyrsta degi í Eystri Rangá

Veiðin í Eystri Rangá hófst formlega í gær eftir vel heppnaða klakveiði þar sem rúmlega 500 löxum var safnað í klakið.

Fyrsti dagurinn í ánni fór langt fram úr væntingum allra við ánna en dagurinn skilaði 123 löxum á land og var það allt stórlax nema einn sem var dæmigerður eins árs lax í ánni.  Stangirnar eru að setja í 10-15 laxa á vakt og svo er auðvitað misjafnt hversu miklu er landað en það sem óneitanlega gleður veiðimenn er þetta fáheyrða stórlaxahlutfall í ánni.  "Þetta er bara ótrúlegt það er ekki hægt að segja annað" sagði Einar Lúðvíksson við Eystri Rangá í hádeginu í dag.  "Gærdagurinn er besta opnun í ánni fyrr og síðar og til að toppa hann þá veiddust 75 laxar í morgun og það er bara óhætt að segja að áin sé full af fiski" bætir Einar við.

Veiðimenn sem við höfum heyrt í sem veiddu í gær og nokkrir í dag bera ánni sömu söguna og segja að það sé fiskur á svo til öllum stöðum á öllum svæðum, mismikið auðvitað en nokkrir bestu staðirnir eru bara kjaftfullir af laxi.