Vísanir í listasögu heimsins

Gunnþóra Gunnarsdóttir skrifar 8. ágúst 2016 10:15

Ólafur í kirkju Samúels áður en sýning málverka og módela var sett þar upp.

Hús Samúels Jónssonar í Selárdal, „listamannsins með barnshjartað“ hefur tekið stakkaskiptum í sumar í höndum manna frá TV-verki. Klæðningu þess er að ljúka og vinna við innréttingar að hefjast.

Í húsinu á að verða kaffistofa, minjagripabúð og gestaíbúð fyrir listamenn, fræðimenn og aðra áhugasama.

Gerhard König myndhöggvari er líka á leið vestur eina ferðina enn, ásamt sjálfboðaliðum, að sinna viðgerðum á listaverkunum. Hann er sérfræðingur í viðgerðum, bæði á steypu og tré.

Þetta upplýsir Vestfirðingurinn Ólafur Engilbertsson hjá Sögumiðlun. Hann fylgist vel með framkvæmdunum enda í stjórn Félags um listasafn Samúels í Selárdal.

Mynd tekin 29. júlí. Íbúðarhúsið Brautarholt hefur verið klætt bárujárni á bakhlið og annarri hliðinni. Hinn gaflinn var steyptur af Samúel sjálfum og heldur upprunalegu útliti eftir viðgerðir innan frá. Tjörupappi verður ráðandi á framhliðinni eins og frá hendi listamannsins. Innrétting hússins er fram undan. Leifur heppni stendur keikur framan við húsið og skyggnir hönd fyrir augu.

„Ég hef vitað af byggingum og listaverkum Samúels frá því ég var unglingur. Eftir að ég var í námi á Spáni fékk ég aukinn áhuga á þeim enda eru fyrirmyndirnar að þeim í sunnanverðri Evrópu. Samúel endurskóp þær norður á hjara. Hann vísar í ljónagosbrunninn í Alhambra á Spáni og gerði eftirlíkingu af Péturskirkjunni í Róm. Líka módel af Taj Mahal á Indlandi og Gullna hofinu í Dehlí en þau eru nú glötuð og lýsi ég hér með eftir þeim, ef einhver skyldi hafa þau undir höndum.“

Íbúðarhús Samúels var að hruni komið en var tekið niður árið 2009 og síðan byggt upp í áföngum. Kirkjuturninn var við það að fjúka í fyrra og fór mikill tími í að bjarga honum að sögn Ólafs.

„Svo þarf að gera við listasafnshúsið áður en það verður hæft til að halda þar sýningar.“

Mynd frá 16. júlí síðastliðnum. Næst sést í kirkjuna, þá er íbúðarhúsið, hálfklætt krossviði og listasafnshúsið lengst til hægri. Neðrabæjarnúpur í baksýn.

Endurbæturnar fóru af stað fyrir alvöru árið 2005, Ólafur segir fjár til þeirra hafa verið aflað í gegnum Uppbyggingarsjóð Vestfjarða, Ferðamálastofu og með frjálsum framlögum.

„Það hefur komið ótrúlega mikið í söfnunarkassa á staðnum, miðað við að enginn er þar að rukka,“ segir hann og laumar að númeri söfnunarreikningsins, 512-26-4403 og kennitölunni 440398-2949.

Fólk af hátt í 20 þjóðernum hefur unnið við björgun mannvirkjanna, að sögn Ólafs. „Þetta er fjölþjóðlegt verkefni enda hefur Samúel vísanir í listasögu heimsins.“

Greinin birtist fyrst í Fréttablaðinu 6. ágúst 2016.

Menning