Verk eftir Atla Heimi, Grieg og Trónd Bogason

Hallveig Rúnarsdóttir sópransöngkona og Jóhannes Andreasen píanóleikari frá Færeyjum, koma fram á tónleikum í Arctic Concerts röðinni í Norræna húsinu í kvöld klukkan 20.30. Þar flytja þau blandaða efnisskrá norrænna sönglaga.

„Ég kom til landsins í gær (fyrradag) til að spila með Hallveigu. Við höfum hist nokkrum sinnum og mússíserað en þá með öðrum, til dæmis í jólaóratóríunni Messíasi. Nú ákváðum við að vera bara tvö,“ segir Jóhannes Andreasen píanóleikari.

Jóhannes er færeyskur en talar lýtalausa íslensku.  „Ég bjó hér í nokkur ár og kenndi við tónlistarskóla, aðallega í Kópavogi. Það var fyrir tuttugu árum en ég hef reynt að halda tungumálinu við,“ útskýrir hann og fer svo nokkrum orðum um efnisskrá tónleikanna í kvöld.  

 „Við völdum að flytja tónlist eftir Atla Heimi Sveinsson og Grieg og svo spila ég líka eitt fjögurra mínútna píanóverk eftir Færeyinginn Trónd Bogason, manninn hennar Eivarar Pálsdóttur og nánasta samstarfsmann, svo þetta verður norrænt prógramm.“

Jóhannes fer lofsamlegum orðum um tónlist Atla Heimis, segir hana skemmtilega og vel skrifaða. „Ég hef oft áður spilað lög eftir Atla Heimi en ekki þau sem við flytjum núna.“

Jóhannes starfar bæði við kennslu og tónleikahald í Færeyjum. Kveðst þó ekki fastur í neinni hljómsveit þar, enda ekki sinfóníuhljómsveit þar sem starfar allt árið. „En ég spila yfirleitt með þegar settar eru saman sveitir, hvort sem það eru sinfóníu- eða kammersveitir.“

 

Greinin birtist fyrst í Fréttablaðinu 4. ágúst 2016.