Kjörsókn gæti ógilt kosningu

Útlit er fyrir að slæleg kjörsókn verði til þess að þjóðaratkvæðagreiðsla Ungverja, um flóttamannakvótakerfi Evrópusambandsins, teljist ógild.

Fyrstu útgönguspár bentu til þess að nær allir sem mættu á kjörstað hefðu hafnað tillögunni. Kjörsókn náði hins vegar ekki 50 prósentum sem áskilin eru til að kosningin teljist gild.

Í tillögu Evrópusambandsins felst að um 160.000 flóttamönnum verði dreift á milli aðildarríkja ESB. Hlutur Ungverja er 1.300 manns samkvæmt tillögunni.

Stærstur hluti flóttamanna sem koma til Evrópu hefur viðkomu í Ungverjalandi á leið sinni til landa vestar í Evrópu. 

Fréttin birtist fyrst í Fréttablaðinu.