Gítartónar Kristins innan um verk Valtýs

Gítarleikarinn Kristinn Árnason heldur tónleika í Listasafni Íslands laugardaginn 22. október. Þeir hefjast klukkan 17. „Þetta eru einleikstónleikar. Ég verð í salnum uppi sem snýr að Tjörninni.  Þar er yfirlitssýning á verkum Valtýs Péturssonar svo umhverfið er skemmtilegt,“ segir Kristinn ánægður.



Á efnisskránni eru þrír þættir eftir Sanz, fúga eftir Bach, Pavane eftir Ravel og ýmis verk eftir Albeniz, Granados og Barrios. „Svo ætla ég að frumflytja eitt verk eftir sjálfan mig, það er eiginlega orðin hefð þegar ég held tónleika,“ segir Kristinn sem kveðst alltaf vera að semja.  

Tónleikarnir hefjast klukkan 17.00 og Kristinn kveðst búast við að þeir taki um það bil klukkutíma og kortér, með hléi.



Svo farið sé yfir feril Kristins þá hefur hann haldið fjölda tónleika hér á landi og erlendis, bæði einn og sem þátttakandi í kammertónlist af ýmsu tagi. Hann hefur haldið einleikstónleika í Wigmore Hall í Lundúnum, Kammerzaal Concertgebouw í Amsterdam og Munch safninu í Ósló auk tónleika á Ítalíu, Spáni, Danmörku og Bandaríkjunum.

Einnig hefur hann leikið inn á fjölda hljómdiska, spilað í útvarp og sjónvarp og starfað í leikhúsunum.



Sex diskar með gítareinleik Kristins hafa komið út auk annarra diska. Diskur hans með verkum eftir Sor og Ponce hlaut Íslensku tónlistarverðlaunin árið 1997 í flokki klassískra hljómdiska og að auki hefur hann fimm sinnum verið tilnefndur til sömu verðlauna. Þá hlaut hann verðlaun úr minningarsjóði Kristjáns Eldjárns árið 2007.



 

Greinin birtist fyrst í Fréttablaðinu 19. október 2016.