Samfylkingin hefur fundað með Pírötum

Formaður Samfylkingarinnar hitti fulltrúa Pírata á fundi í Reykjavík í morgun. Hún segist alltaf til í að ræða stefnu Samfylkingarinnar og það liggi fyrir í landsfundarsamþykkt flokksins að endurskoða beri stjórnarskrána á grundvelli þeirrar vinnu sem liggi fyrir. Formaður Vinstri grænna segir eðlilegt að kjósendur viti hvaða flokkar ætli að vinna saman að loknum kosningum.

Píratar buðu hinum stjórnarandstöðuflokkunum á sunnudag að ganga til viðræðna við sig um samstarf flokkanna eftir kosningar. Blendin viðbrögð hafa verið við þessu tilboði. Viðbrögðin hafa verið heldur dræm í herbúðum Bjartrar framtíðar og Viðreisnar, þar sem menn telja eðlilegt að kosningar farið fram áður en farið verði að ræða samstarf. En Oddný G. Harðardóttir formaður Samfylkingarinnar tók vel í að ræða við Pírata og hitti fulltrúa þeirra á fundi klukkan ellefu í morgun.

„Við tókum vel í boð Pírata og fögnum því að fá að ræða stefnu Samfylkingarinnar við þau eins og aðra. Við teljum ekki ástæðu til að setja einhver sérstök skilyrði fyrir því svona í byrjun að minnsta kosti,“ segir Oddný.

Sjá einnig: Blendin viðbrögð við útspili Pírata

En á fréttamannafundi Pírata á laugardag settu fulltrúar flokksins fimm skilyrði fyrir samstarfi við stjórnarandstöðuflokkana eftir kosningar. Þau eru ný stjórnarskrá, réttlátari dreifing á arðinum af auðlindum landsins, endurreisn gjaldfrjálsrar heilbrigðisþjónustu, öflugri aðkoma almennings að ákvarðanatöku og endurvakning trausts með því að „tækla“ spillingu, eins og þau orða það.

Oddný segir Samfylkinguna til að mynda hafa landsfundarsamþykkt fyrir því að endurskoða eigi stjórnarskrána á grundvelli þeirrar vinnu sem liggi fyrir um hana.

En Samfylkingin hefur átt undir högg að sækja í könnunum og er Oddný bjartsýn á að flokkurinn nái að vinna meira fylgi fyrir kjördag.

„Við vinnum að því og trúum því að niðurstaðan á kjördag verði betri en kannanir sýna,“ segir Oddný. Málatilbúnaði flokksins sé víðast hvar tekið vel á fundum um landið og fólki líki við stefnu Samfylkingarinnar.

VG vill sameiginlegan fund

Katrín Jakobsdóttir formaður Vinstri grænna svaraði erindi Pírata í gær þar sem hún sagði eðlilegt að ef ræða ætti samstarf stjórnarandstöðuflokkanna kæmu þeir allir saman til fundar. Hún væri jákvæð gagnvart samstarfi enda hefðu Vinstri græn talað um samstarf stjórnarandstöðuflokkanna allt þetta kjörtímabilið og geti skrifað undir margt af því sem Píratar leggi fram. En Vinstri græn séu með fleiri mál eins og skólamálin þar sem úrbóta sé þörf.

„En ég get líka nefnt umhverfis- og loftlagsmál sem ekki eru nefnd að hálfu Pírata en eru auðvitað algert forgangsmál hjá okkur og ég gæti nefnt fleiri mál. Þess vegna einmitt tel ég svo mikilvægt  að við áttum okkur betur á því hvaða mál það eru hjá þeim sem vilja taka þátt í þessu samtali sem flokkarnir vilja setja á dagskrá,“ segir Katrín.

Hins vegar sé hún almennt hlynt því að stjórnmálin hér þróist í átt til þess sem þekkist á hinum Norðurlöndunum að flokkar myndi blokkir fyrir kosningar.

„Já, við höfum talað fyrir því. Við Vinstri græn ályktuðum um þetta í febrúar. Að við teldum að stjórnarandstöðuflokkarnir ættu að vinna saman að loknum kosningum ef þeir fengju til þess umboð almennings. Mér finnst mjög jákvætt að almenningur viti þá með hverjum flokkarnir vilji vinna eftir kosningar en líka þá um hvað,“ segir Katrín Jakobsdóttir.