Árleg urriðaganga á Þingvöllum á laugardaginn

Hin árlega urriðaganga verður á Þingvöllum á laugardaginn kemur og að þessu sinni spáir góðu veðri á þáttakendur.

Þetta er árleg fræðsluganga á vegum Þjóðgarðsins á Þingvöllum og Laxfiska til kynningar á Þingvallaurriðanum og verður gangan haldin næst komandi laugardag á Þingvöllum á bökkum Öxarár 14. árið í röð.  Gangan hefst klukkan 14:00 við bílastæðið þar sem forðum stóð Valhöll, sjá nánar tengil á vefsvæði Þingvallaþjóðgarðs: https://thingvellir.is/2243

Veðurstofa Íslands spáir því að það verði mjög gott veður á Þingvöllum þennan dag, léttskýjað, góður hiti og mjög hægur vindur.  Jóhannes Sturlaugsson sem hefur veg og vanda að kynningunni hefur þegar veitt nokkra urriða sem hann ætlar að kynna fyrir gestum.  Þeir sem hafa ekki ennþá farið eru hvattir til að gefa sér tíma á laugardaginn því þetta er alveg einstakt að sjá urriðann í svona miklu návígi og eins að sjá þá urriða sem raða sér upp í Öxará og eru að gera sig tilbúna til hrygningar.