Stjórnarandstaðan mun kanna möguleikann á stjórnarmyndun nái hún til þess meirihluta

Fundi stjórnarandstöðuflokkanna sem hófst klukkan 10.30 í morgun lauk núna rúmlega hálftólf.

Í samhljóða yfirlýsingu sem lesa má meðal annars á Facebook-síðu Katrínar Jakobsdóttur formanns Vinstri grænna og Oddnýjar Harðardóttur formanns Samfylkingarinnar segir að flokkarnir fjórir, Píratar, Vinstri græn, Samfylking og Björt framtíð, telji fulla ástæðu til þess að kanna möguleika á myndun meirihlutastjórnar fái flokkarnir til þess umboð í komandi kosningum.

Birgitta Jónsdóttir hjá Pírötum og Óttarr Proppé formaður Bjartrar framtíðar birtu sams konar yfirlýsingu á Facebook-síðum sínu.

Yfirlýsinguna má lesa í heild sinni hér að neðan en athygli vekur að rétt eftir fundinn boðaði Björt framtíð til blaðamannafundar sem hefst klukkan 14.

Í dag hittust formenn og talsmenn Pírata, Vinstri Grænna, Samfylkingarinnar og Bjartrar framtíðar á ný. Þessir flokkar hafa unnið vel saman í stjórnarandstöðu á þessu kjörtímabili sem er óvenju stutt vegna afhjúpana Panama-skjalanna sem sýndu tengsl ríkisstjórnarflokkanna við aflandsfélög í skattaskjólum.

Nú er rétti tíminn til að ráðast í þau verk sem þjóðin kallar eftir, uppbyggingu innviða og skapa traustan og stöðugan grunn fyrir aukin lífsgæði. Það þarf nýja forgangsröðun og sýn á samfélagið. Til að varanlegur stöðugleiki komist á, verður að ástunda ábyrga efnahagsstjórn en jafnframt vinna að félagslegum stöðugleika. Að öðrum kosti næst ekki sátt í samfélaginu að loknum kosningum.

Þörf er á betri vinnubrögðum sem byggjast á fagmennsku, samvinnu og gagnsæi. Vanda þarf til verka og innleiða kerfisbreytingar skref fyrir skref.

Við höfum nú á tveimur fundum skoðað kosningaáherslur flokkanna og finnum mikinn samhljóm. Við teljum samstarf þessara flokka vera skýran valkost við núverandi stjórnarflokka sem getur skapað ný tækifæri fyrir íslenskt samfélag.

Á grundvelli þessa teljum við fulla ástæðu til að kanna möguleika á myndun meirihlutastjórnar ef þessir flokkar fá til þess umboð í komandi kosningum.

Flokkarnir hittust einnig síðastliðinn sunnudag en þá var vika liðin frá því að Píratar sendu flokkunum þremur, ásamt Viðreisn, bréf þar sem þeim var boðið til viðræðna um samstarf að loknum kosningum. Viðreisn tók ekki boðinu en hinir flokkarnir þrír gerðu það.

Í yfirlýsingu Pírata sem þeir sendu frá sér þann 16. október sagði meðal annars:

„Sú hefð hefur skapast í íslenskum stjórnmálum að loforð eru einatt svikin eftir kosningar og bera menn fyrir sig „pólitískum ómöguleika“, eins og frægt er orðið. Hefðin er sú, að stjórnmálaflokkar sem mynda ríkisstjórnir á Íslandi skýla sér bakvið málamiðlanir í stjórnarmyndun. Þannig tekst þeim ítrekað að svíkja kjósendur sína,“ segir í yfirlýsingunni.

„Við Píratar viljum koma í veg fyrir pólitískan ómöguleika. Við viljum kerfisbreytingar. Við ætlum ekki að blekkja kjósendur. Við munum ekki taka þátt í ríkisstjórnarsamstarfi með þeim flokkum sem ekki geta skuldbundið sig til ákveðinna verka fyrir kosningar.“

Ekki verður annað skilið af yfirlýsingunni sem formenn VG og Samfylkingar sendu frá sér en að enginn formlegur sáttmáli eða samstarfssamningur liggi fyrir, en skýr vilji er þó til samstarfs hjá flokkunum fjórum.