Fyrsti snjórinn féll í höfuðborginni: „Slydda sem breytist fljótt í rigningu“

Mörgum var eflaust brugðið þegar fyrsti snjór vetrarins féll í höfuðborginni í morgun.

„Þetta er einhver slyddukrapi einhver. Það á fljótlega eftir að fara yfir í rigningu,“ segir Árni Sigurðsson, veðurfræðingur á Veðurstofunni.

Árni segist ekki viss hvort þetta geti talist sem snjókoma. „Við köllum þetta nú bara slyddu hérna á Veðurstofunni.“

Hann segir að það eigi eftir að ganga yfir í austan hvassviðri. „Þetta er að fara yfir í rigningu. Svo eftir hádegi snýr hann sér í suðlæga átt með skúrum. Við fáum hérna lægð í kvöld inn á Faxaflóann, þannig að það mun hvessa hérna meira með kvöldinu. Það er sem sagt frekar leiðinlegt veður í dag,“ segir Árni.

Veðurhorfur á landinu

Gengur í austan 13-20 m/s með rigningu sunnantil með morgninum, en mun hægari og bjartviðri norðaustan- og austanlands fram eftir degi. Snýst í sunnan 8-13 með skúrum fyrst sunnantil síðdegis, en lægir og rofar til norðaustanlands í kvöld. Hiti yfirleitt 4 til 9 stig að deginum. Snýst í vestanátt á morgun, 5-13 m/s með skúrum eða slydduéljum en lengst af þurrt um landið austanvert. Kólnar í veðri.

Veðurhorfur á landinu næstu daga

Á fimmtudag: Vestlæg átt, allhvöss um tíma sunnantil. Skúrir eða él í flestum landshlutum, en úrkomulítið á Suðausturlandi. Hiti 0 til 6 stig, mildast um landið sunnanvert.

Á föstudag: Suðvestan kaldi með éljum, en hægari og léttskýjað austanlands. Hiti 0 til 5 stig.

Á laugardag: Líklega allhvöss sunnanátt austanlands með rigningu, en norðaustanátt um landið vestanvert og fer yfir í slyddu eða snjókomu norðvestanlands.

Á sunnudag: Útlit fyrir nokkuð hvassa norðvestanátt og snjókomu eða slyddu um landið norðanvert, en úrkomulítið sunnantil.

Á mánudag: Lítur út fyrir vestlæga átt og þurrviðri.