Segir „fjórmenningaklíkuna“ hafa hótað að eyðileggja Þjóðfylkinguna

Helgi Helgason, formaður Íslensku Þjóðfylkingarinnar, segir að þeir fjórir einstaklingar sem voru reknir formlega úr flokknum á flokksstjóærnarfundi í gær hafi hótað því að „eyðileggja flokkinn“. Fundurinn var haldinn í gær en umræddir einstaklingar höfðu dregið sig úr flokknum skömmu áður en skila átti inn framboðslistum.

„Þegar nokkuð var liðið á fundinn birtust skyndilega þrjár manneskjur sem í síðustu viku sögðu sig með látum frá framboði fyrir Íslensku þjóðfylkinguna og þar með úr flokknum. Þessar manneskjur höfðu þar af  leiðandi ekki verið boðaðar á flokksstjórnarfund í gær. Þetta ágæta fólk ruddist með látum inn á fundinn og krafðist þess að fá að sitja hann sem að sjálfsögðu kom ekki til greina,“ segir Helgi í tilkynningu til Vísis.

Um er að ræða þau Gunnlaug Ingvarsson, Gústaf Níelsson, Ingu Guðrúnu Halldórsdóttur og Svanhítu Brynju Tómasdóttur.

Sjá einnig: Frammámönnum í Þjóðfylkingunni vísað á dyr og hótað lögregluvaldi.

„Á þessum tíma punkti tók fundarstjóri, sem var Guðmundur Þorleifsson, fyrir skriflega tillögu um að „fjórmenningaklíkan“ eins og þau kalla sig sjálf, verði formlega rekin úr flokknum.“

Helgi segir að sú tillaga hafi verið samþykkt með öllum atkvæðum, en tveir hafi setið hjá. Eftir það hafi staðið í stappi í nokkrar mínútur þar til „tókst að fá fólkið út úr fundarherberginu og fram á gang þar sem þau héldu áfram miklum hrópum og köllum.  Höfðu þau uppi heitstrengingar um að eyðileggja flokkinn endanlega. Fundarmenn héldu að mestu ró sinni en var þó verulega brugðið.“

Þá segir Helgi að það sé rétt að orð hafi fallið um að kalla til lögreglu til að koma fólkinu út enda hafi æsingurinn verið orðinn þannig að fólki stóð ekki á sama.

„Gunnlaugur hefur látið þau orð falla í fréttamiðlum í dag að hann skrifi það algjörlega á reikning formanns flokksins að hann og Gústaf Níelsson hafi ákveðið að sprengja framboðið, daginn áður en frestur til þess að skila inn gögnum var liðinn,“ segir Helgi.

„Auðvitað sér hvert mannsbarn í gegnum svona málflutning.“

Hugsi yfir tilganginum

Ennfremur segir Helgi að þau hafi haldið því fram að hann hafi ekki haft stjórn á einu eða neina innan flokksins. Svo sé hins vegar ekki.

„Það tók heilmikið á að hafa stjórn á fjórmenningunum sem vildu ekki fara eftir samþykktum eða lögum flokksins þegar þeim hentaði ekki, en vitnuðu í samþykktir og lög þegar það hentaði þeim. Undir það síðasta var komin fram krafa frá þessum aðilum um að prófkúra á reikning flokksins yrði færð frá stjórninni til tveggja gjaldkera sem auðvitað áttu að koma úr þeirra röðum geri ég ráð fyrir.“

Hann segir að auk þess að vera slegið yfir „innrás þessa fólks“ á fundinn sé flokksfólk hugsi yfir tilgangi þessarar uppákomu.

„Hélt þetta ágæta fólk virkilega að fundarmenn yrðu upprifnir yfir heimsókn þeirra og þau fengju bara að sitja fundinn eins og ekkert hefði í skorist?

Íslenska þjóðfylkingin heldur sínu striki. Stefnumálin hafa ekkert breyst og við erum ennþá baráttu glöð. Eftir stendur þéttur hópur sem vinnur saman af heiðarleika og trúmennsku við stefnuna.“