Skrifaði í dagbók að hann hefði lamið konuna sína

Sparkari NFL-liðsins NY Giants, Josh Brown, opinberaði margt um sjálfan sig í dagbókarskrifum sem nú eru komin fram í dagsljósið.

Hann var settur í eins leiks bann í upphafi leiktíðar 2015 fyrir ofbeldi gegn eiginkonu sinni. Hann var einnig kærður fyrir heimilisofbeldi en sú kæra var dregin til baka fimm dögum síðar.

Það var gert þó svo þáverandi eiginkona hans hefði komið með gögn sem sýndu fram á að Brown væri ofbeldismaður. Hún sagði að Brown hefði misþyrmt henni að minnsta kosti tuttugu sinnum.

„Ég hef bæði líkamlega og andlega verið viðbjóðslegur maður. Ég hef gengið á skrokk á konunni minni,“ skrifaði Brown í einni af dagbókarfærslum sínum.

Eftir að hafa farið í hjónabandsráðgjöf skrifaði hann vinum þeirra bréf.

„Ég hef verið lygari mest allt mitt líf. Ég tók þá sjálfselsku ákvörðun að nota og misþyrma konum þegar ég var aðeins 6 eða 7 ára. Ég hlutgerði konur og var alveg sama um sársaukann sem ég var að valda þeim. Ég gat ekki með nokkru móti tengst fólki tilfinningalega. Þar sem ég tók aldrei á þessum vandamálum mínum varð ég ofbeldismaður sem fór illa með eiginkonu mína. Bæði líkamlega og andlega. Ég leit á sjálfan mig sem Guð og hún var þrællinn minn,“ skrifaði Brown.

Giants hefur ekki brugðist við þessum nýju upplýsingum en félagið sendi honum stuðningsyfirlýsingu í upphafi sumars.