Piana hjólar í Söru Heimis: Stal peningum og giftist mér aðeins fyrir græna kortið

„Mig langar að tjá mig um hluti sem ég ætlaði aldrei að gera, þar sem þetta tengist mínu einkalífi,“ segir vaxtaræktarmaðurinn Rich Piana sem tjáir sig um ástæðurnar fyrir því að hjónabandi hans og Söru Heimisdóttir lauk í sumar.

„Fólk er enn að saka mig um allskonar vitleysu varðandi það af hverju við hættum saman. Fyrir mér var ég í skelfilegri aðstöðu og ég sé það greinilega núna þegar ég lít til baka. Þetta er frekar vandræðalegt fyrir mig í dag en fólk í kringum mig var mikið að velta því fyrir sér af hverju ég ætlaði að giftast konu sem ég hafði aðeins þekkt í nokkra mánuði.“

Sara og Piana eru skilin en um ár er frá því þau gengu í það heilaga á Mr. Olympia-keppninni í Las Vegas í september á síðasta ári.

Vandræðalegt fyrir mig

„Mínir nánustu sögðu mér að Sara væri bara að giftast mér til að fá græna kortið og ég móðgaðist gríðarlega þegar ég fékk slíkar ábendingar. Núna þegar ég lít til baka sé ég að það var greinilega málið. Þetta er fokking vandræðalegt fyrir mig og mér líður eins og ég sé heimskur. Þetta var svo ótrúlega augljóst. Til að byrja með gómaði ég hana að stela peningum frá mér. Hún millifærði peninga frá mínum reikningi til Íslands, inn á reikning hjá fjölskyldumeðlimum hennar,“ segir hinn 45 ára Piana og bætir við að hann hafi ekki trúað sínum eigin augum.

„Ég gerði allt fyrir hana og eyddi ótrúlega miklum peningum í það að láta henni líða vel. Það er ótrúlega sárt að komast síðan að því að sú manneskja sé að stela frá mér og ég bara trúði þessu einfaldlega ekki. Stuttu eftir það heyrði ég samtal milli Söru og mömmu hennar en þær töluðu alltaf íslensku fyrir framan mig, og ég skildi því aldrei neitt. Mér fannst alltaf skrítið að hún skildi tala á íslensku við mömmu sína fyrir framan mig, en auðvitað var ég bara heimskur og fattaði þetta ekki. En ég gerði mér samt grein fyrir því þegar ég heyrði þetta samtal að hún væri bara með mér fyrir græna kortið.“

Bað hana um að fara út úr húsinu

Hann segist þá hafa rætt við Söru og einfaldlega spurt hvort grunur hans væri á rökum reistur.

„Eftir þetta vildi ég bara losna við hana og bað hana um að fara strax út úr húsinu. Hún samþykkti að lokum að fara út úr húsinu eftir einhvern tíma.“

Hér að neðan má sjá Rich Piana tjá sig í löngu máli um ástæðurnar fyrir skilnaðnum.