Vinsældir Ólafíu trufluðu upphitunina: Ég er ekki vön þessu

Ólafía Þórunn Kristinsdóttir er fjórum höggum frá efsta sætinu á Fatima Bint Mubarak mótinu á LET Evrópumótaröðinni í Abú Dabí eftir að hafa leikið á tveimur höggum yfir pari á þriðja hringnum.

Þetta var sjö högga sveifla hjá Ólafíu Þórunni því hún var með þriggja högga forskot eftir tvo fyrstu hringina. Fjórir skollar, þar af tveir í byrjun hringsins, sáu til þess að hún hefur nú aðeins dregist aftur úr efstu konum fyrir lokahringinn á morgun.

„Það er frábært að vera ellefu undir fyrir lokadaginn en dagurinn í dag var svolítið ströggl. Ég byrjaði ekki nógu vel,“ sagði Ólafía Þórunn í viðtali á heimasíðu Evrópumótaraðarinnar og hún var með eina skýringu á því.

„Ég náði ekki að hita upp nógu vel af því að það komu upp aðstæður sem ég er ekki vön. Það var fólk að koma til mín og taka myndir af mér og biðja mig um að svara einhverjum spurningum,“ sagði Ólafía

„Ég náði ekki alveg að pútta í byrjun og var ekki alveg nógu ánægð með það,“ sagði Ólafía en var samt ánægð með margt.

„Ég náði alveg að vera róleg í dag. Það var mjög gaman að fá tækifæri til að spila með þeim Gwladys (Nocera frá Frakklandi) og Georgiu (Hall frá England) því þær eru báðar frábærir kylfingar. Það var heiður að fá að spila með þeim,“ sagði Ólafía.

„Ég trúi því að ég geti unnið á morgun. Ég þarf bara að eiga einn góðan dag eins og hina dagana,“ sagði Ólafía.  Það er hægt að sjá viðtalið við hana í spilaranum hér fyrir ofan.