Ólafía Þórunn byrjar frábærlega í Abu Dhabi

Ólafía Þórunn Kristinsdóttir, atvinnukylfingur úr GR, byrjar frábærlega á sterku móti á LET Evrópumótaröð kvenna sem hófst í dag. Hún er efst á sjö höggum undir pari þegar þetta er skrifað en nokkrir kylfingar eiga eftir að ljúka leik.

Ólafía Þórunn fékk átta fugla á fyrsta hring og aðeins einn skolla og spilaði hringinn á 65 höggum eða sjö höggum undir pari.

Hún fékk fjóra fugla á fyrri níu og fjóra á seinni níu en eini skollinn hennar kom á 14. braut sem er par fjögur.

Minea Blomqvist frá Finnlandi getur enn farið upp fyrir Ólafíu Þórunni en hún er á fjórum höggum undir pari eftir aðeins sex holur. Sophie Walker frá Englandi er svo á þremur undir eftir níu holur.

Staðan í mótinu.