Helgi Hrafn og Birgitta ósammála um launahækkanir þingmanna

Helgi Hrafn Gunnarsson, fráfarandi þingmaður Pírata, biður fólk um að anda með nefinu vegna launahækkana þingmanna.

„Já, þær eru mjög, mjög háar og virðast í fljótu bragði í miklu ósamræmi við það sem verið hefur. En hugmyndir um að þingmenn taki málin í eigin hendur eru vondar. Nærri lagi væri að auka gegnsæið á bakvið ákvaðanirnar, setja reglur um ákveðin viðmið og fjarlægja kjararáð meira frá Alþingi,“ segir Helgi Hrafn á Facebook.

Sjá einnig: Laun alþingismanna hækka um nálega 340 þúsund

Hann segir hættu á tvennum mistökum, sem séu vel meintar en engu að síður mistök.

Önnur er sú að Alþingi komi saman og taki eigin launamál í eigin hendur. „Það er versta mögulega leiðin til að kljást við þetta,“ segir Helgi Hrafn.

Hin sé sú að einstaka þingmenn taki upp á sitt einsdæmi að hafna þessum hækkunum opinberlega.

Birgitta Jónsdóttir, þingmaður Pírata, sagði á Facebook fyrr í dag að ef allir þingmenn hafni þessum hækkunum til að sýna í verki að þeim sé umhugað um stöðugleika á vinnumarkaði séu það skýr skilaboð til almennings í landinu að þeir ætli ekki að taka þátt í að búa til gjá þings og þjóðar.

Hún sagðist jafnframt ætla að taka þetta mál upp á þingflokksfundi Pírata seinna í dag. „Ég byrja að sjálfsögðu á sjálfri mér til að sýna gott fordæmi, sagði Birgitta í athugasemd við Facebook-færslu sína.

Líkt og Helgi Hrafn segir er það að hans mati ekki gott að einstaka þingmenn taki upp á sitt einsdæmi að hafna þessum hækkunum opinberlega.

„Vilji þeir gera það í kyrrþey er það annað mál, en það er vond þróun ef það myndast ójafnræði í launamálum þingmanna út frá tilteknum flokkum eða hópum. Við það myndast beinlínis fjárhagslegur hvati til að bjóða sig frekar fram fyrir flokk þar sem hvorki reglur né skömm ríkir yfir laununum. Þá myndast einnig fælni við að bjóða sig fram fyrir þann flokk sem ýmist bannar þingmönnum sínum eða skammar þá fyrir að taka við launum sem einhver annar hefur ákveðið fyrir þá,“ segir Helgi Hrafn.

Hann segist skilja reiði Íslendinga vegna málsins en að þeir verði að hætta að komast að niðurstöðu um mikilvæga hluti í brjálæðiskasti.

„En við skulum ekki í einhverju geðvonskukasti koma því fyrirkomulagi á að þingmenn séu sjálfir að ákveða sín eigin laun eða að búa til einhverjar reglur um sjálfa sig hvað þykir við hæfi og hvað ekki. Það að kjararáð þyki óhæft akkúrat núna til að ákveða laun þingmanna þýðir ekki að þingmenn séu sjálfir hæfari til þess en áður. Afsakið óvinsælu skoðunina.“