Kemur brátt í ljós hvort grund­völlur er til sam­starfs stjórnar­myndunar­flokkanna

Forystumenn stjórnarmyndunarflokkanna og málefnahópar á þeirra vegum halda væntanlega áfram tilraunum sínum til myndunar meirihluta á Alþingi í dag. Formaður Viðreisnar segir að hann vilji að það skýrist á næstu sólarhringum hvort grundvöllur sé til samstarfs flokkanna.

Bjarni Benediktsson formaður Sjálfstæðisflokksins hóf formlegar stjórnarmyndunarviðræður við Viðreisn og Bjarta framtíð síðast liðinn laugardag. En áður en þær hófust sagði Bjarni að niðurstaða ætti að liggja fyrir innan fárra daga um hvort grunvöllur væri til samstarfs þessara flokka,

Fundað hefur verið í þremur málefnahópum flokkanna um helgina og í gær og formennirnir þrír hafa verið í stöðugu sambandi, meðal annar í gær að sögn Benedikts Jóhannessonar formanns Viðreisnar.

„Ég held við höfum skipst á skeytum fram til klukkan half ellefu í gærkvöldi,” segir Benedikt. Ötullega sé unnið að málefnunum.

„Margt gengur mjög vel en á öðrum stöðum ber meira í milli og svo þarf að beita meira hugviti sumstaðar til að finna lausnir,” segir formaður Viðreisnar.

Hann tekur undir með Bjarna um að niðurstaða ætti að geta legið fyrir um miðja þessa viku. Á morgun eða hinn.

„Ég held að það væri mjög æskilegt að það gerðist já. Ég held að það sé engum greiði gerður að við höldum þessu áfram ef það gengur ekki. En þetta þokast í rétta átt,“ segir Benedikt.

Þannig að þér finnst kannski líklegra að þið náið saman um samstarf en ekki?

„Ég get eiginlega ekki sagt það fyrr en fyrr en við erum búin að leysa síðasta hnútinn.“

Menn verða að sætta sig við úrslit kosninga

Formaður Viðreisnar vill ekki útlista hvaða mál séu erfiðust en menn geti sjálfir gert sér það í hugarlund útfrá stefnu flokkanna þriggja. Þegar rætt var við hann um klukkan tíu í morgun var ekki búið að boða nýja fundi en honum þótti líklegt að gerðist bráðlega. Hlutverk formannanna hafi verið að reyna að leysa úr ágreiningi sem komi upp í vinnu málefnahópanna.

Óttarr Proppé formaður Bjartrar framtíðar hefur orðið fyrir meiri gagnrýni en formenn hinna flokka á samfélagsmiðlum og víðar vegna þessarar stjórnarmyndunartilraunar. Benedikt segir að menn verði að sætta sig við úrslit kosninganna hvort sem þeim líki betur eða verr.

„Þá er það okkar sem í stjórnmálunum eru að reyna að vinna út úr því. Það er beinlínis skylda okkar,“ segir Benedikt.

Í dag eru sex vikur til áramóta og ljóst að Alþingi þarf að minnsta kosti að afgreiða fjárlög fyrir áramót og þrýst er á að lausn verði fundin á jöfnun lífeyrisréttinda fyrir þann tíma líka. Benedikt segir menn gera sér grein fyrir að tíminn líði hratt.

Finnst þér þá mikilvægt að forsetinn feli öðrum umboðið fyrir helgi ef ekki tekst að ná saman með ykkur?

„Ég ætla ekkert að segja fyrir um hvað forsetinn á að gera. Við eigum alveg nóg með að uppfylla okkar störf,“ segir Benedikt. Það sé mikilvægt að það liggi fyrir á næstu sólarhringum hvort flokkarnir telji að þeir nái að klára stjórnarsáttmála.

„En þetta er töluverð vinna. Síðast voru menn tæpar fjórar vikur að skrifa stjórnarsáttmála. Þannig að það er augljóslega talsverð vinna þótt ég reikni ekki með að það taki okkur jafnlangan tíma,“ segir Benedikt.