Ólafía Þórunn rétti sig af á seinni níu

Ólafía Þórunn Kristinsdóttir gerði engin mistök á síðari níu holunum sínum á Hero Women's Indian Open mótinu á Indlandi í morgun.

Hún byrjaði ekki nógu vel og missti fjögur högg á fyrstu sex holunum sínum í morgun. En hún hélt striki eftir það og paraði hinar tólf holurnar, þar af allar á seinni níu.

Ólafía Þórunn ræsti af tíunda teig í morgun og fékk skolla á tólftu og fimmtándu holu. Hún fékk þar að auki skramba á fjórtándu holu.

Keppt er á aðalvelli DLF-klúbbsins í Gurgaon á Indlandi en Ólafía Þórunn sagði við íþróttadeild í gær að um afar krefjandi völl væri að ræða. Það væri auðvelt að tapa höggum og að skor keppenda á þessum velli væri yfirleitt hátt.

Það sést best á því að Ólafía Þórunn náði að mjaka sér upp töfluna í dag með því einu að spila á pari á síðustu tólf holunum. Var hún í 43.-58. sæti þegar hún kom í hús en þá áttu einhverjir kylfingar enn eftir að ljúka keppni.

60 bestu kylfingarnir komast í gegnum niðurskurðinn á morgun og ljóst að ef Ólafía Þórunn heldur sínu striki þá á hún góðan möguleika á því.

Olafía Þórunn þarf þó að bæta sinn leik á morgun til að blanda sér í toppbaráttuna en sem stendur er hún sex höggum á eftir efstu kylfingum.

Hún var fyrir mótið í 105. sæti peningalista Evrópumótaraðarinnar en þarf að vera í hópi efstu kylfinga mótsins í Indlandi til að komast í hóp 80 efstu og endurnýja þátttökurétt sinn fyrir næsta keppnistímabil.