Pissaði í ruslatunnu á meðan hann var að lýsa

Það er ekki alltaf auðvelt að lýsa íþróttaleikjum í sjónvarpi. Ekki síst er náttúran kallar.

Það er mismunandi hvernig menn tækla slík vandræði en þegar menn eru í spreng þá er iðulega ekki hægt að gera neitt í málinu.

Reynsluboltinn Bob Costas lenti í þessum vandræðum er hann var að lýsa fyrir tveimur árum síðan. Þá hljóp hann bara á klósettið og lét þann er var að lýsa með honum sjá um lýsinguna á meðan. Costas var kominn aftur tveimur mínútum síðar sem er aðdáunarverður tími í ljósi þess að hann var að lýsa á vellinum.

Er Joe Buck var að byrja að lýsa NFL árið 1994 bankaði náttúran upp á og hinn ungi Buck, sem lýsir fyrir Fox, vissi ekki hvað hann átti að gera.

Hann vippaði því félaganum út og pissaði í ruslafötu á meðan hann lýsti snertimarki í leiknum. Gerði það líka fumlaust. Fagmennska.

Það var aftur á móti ekki eins mikil fagmennska í því að aðeins voru búnar fimm mínútur af leiknum þarna. Það er lykilregla að fara á klósettið fyrir leiki til að koma í veg fyrir svona vesen.