Leik hætt í Dúbaí er kylfuberi lést á fyrsta hring

Leik hefur verið hætt á fyrsta hring á Dubai Ladies Masters-mótinu sem hófst í Dubaí í dag vegna andláts kylfubera.

Frá þessu greindi yfirstjórn Evrópumótaraðarinnar fyrir skömmu en mikil sorg ríkir á mótinu vegna þessara skelfilegu tíðinda.

Kylfuberinn hefur ekki verið nafngreindur en viðkomandi hneig niður á þrettándu braut og lést síðar á sjúkrahúsi.

„Allir á Evrópumótaröð kvenna eru í áfalli og virkilega sorgmæddir vegna þessa andláts og hefur því verið ákveðið að stöðva fyrsta hringinn. Við vottum aðstandendum þess látna okkar dýpstu samúðarkveðjur,“ segir Ivan Khodabakhsh, framkvæmdastjóri mótaraðarinnar.

Enginn kylfingur var búinn með meira en tíu holur þegar kylfuberinn féll frá. Mótið fer aftur af stað á morgun og verða aðeins spilaðar 54 holur.

Ólafía Þórunn Kristinsdóttir er með rétt til að spila á Evrópumótaröðinni en eins og Vísir greindi frá í gær mun hún ekki sækjast eftir að halda áfram þar eftir að hún tryggði sér keppnisrétt á bandarísku atvinnumótaröðinni.