Birgitta tilnefnd sem stjórnmálapersóna ársins hjá Spiegel

Birgitta Jónsdóttir, þingflokksformaður Pírata hefur verið tilnefnd sem stjórnmálapersóna ársins hjá þýska vefmiðlinum Spiegel Online. Lesendur miðilsins geta valið úr 25 einstaklingum sem taldir eru hafa haft ótvíræð áhrif í stjórnmálum á árinu og er Birgitta þar á meðal.

Á vef Spiegel segir að Birgitta hafi leitt flokk Pírata til 14 prósenta fylgis í þingkosningum á Íslandi og fleytt flokknum í stjórnarmyndunarviðræður.

Þingkonan er valkostur ásamt nokkrum heimsfrægum stjórnmálamönnum sem áhrif hafa haft á heimsbyggðina á liðnu ári, stjórnmálamenn eins og Barack Obama, Vladimír Pútín, Donald Trump, Hillary Clinton og Raul Castro.

Einnig eru persónur tilnefndar sem haft hafa áhrif á stjórnmálin með óhefðbundnari hætti svo sem eins og uppljóstrarinn Edward Snowden og Yau Wai-ching, baráttukona fyrir sjálfstæðri Hong Kong.