Skipverjarnir leiddir í land og á leið í yfirheyrslu

Grænlenski togarinn Polar Nanoq lagðist að bryggju við Hafnarfjarðarhöfn um klukkan 23 í kvöld. Þrír úr áhöfn skipsins voru handteknir fyrr í dag og í kvöld vegna gruns um að þeir búi yfir upplýsingum um hvarf Birnu Brjánsdóttur aðfaranótt síðastliðins laugardags.

Grímur Grímsson, yfirlögregluþjónn á höfuðborgarsvæðinu, hefur staðfest að skipverjarnir þrír sem voru handteknir hafa allir verið leiddir frá borði og verða færðir á lögreglustöð þar sem þeir verða yfirheyrðir.

Skipið er kyrrsett á meðan lögreglan leitar í skipinu. Rúmlega 20 eru í áhöfn skipsins en þeir sem eru ekki handteknir eru með stöðu vitnis í málinu og verður tekin vitnaskýrsla af þeim. Þeir sem eru með stöðu vitnis í áhöfn sæta ekki landgöngubanni en Grímur Grímsson sagði við Vísi fyrr í kvöld að skipið geti lagt um höfn um leið og lögreglan hefur lokið leit og klárað vitnaskýrslutökur.

Fyrstu tveir handteknir um hádegisbil

Um hádegisbilið handtóku lögreglumenn í sérsveit ríkislögreglustjóra tvo menn um borð í grænlenska skipinu um það bil 90 mílur suðvestur af landinu. Í tilkynningu kom fram að sérsveitarmennirnir hefðu farið um borð í skipið úr þyrlu Landhelgisgæslunnar, TF LÍF. Þeir tóku yfir stjórn skipsins sem nú erkomið til hafnar.

Enginn mótþrói var sýndur þegar lögreglumennirnir sigu niður í skipið og tóku yfir stjórn þess.

Sá þriðji handtekinn um kvöldið

Um klukkan hálf níu í kvöld var þriðji maðurinn handtekinn um borð í skipinu þar sem það var á leið til landsins.

Ástæða handtöku hans er sú hin sama og hvað varðar hina tvo, það er að grunur leikur á að hann búi yfir upplýsingum um hvarf Birnu Brjánsdóttur hinn 14. janúar síðastliðinn.

Mennirnir þrír sem handteknir voru eru allir grænlenskir og með réttarstöðu sakbornings.

Grímur Grímsson, yfirlögregluþjónn á höfuðborgarsvæðinu, sem stýrir rannsókninni á hvarfi Birnu sagði rannsókn lögreglunnar á höfuðborgarsvæðinu hafa leitt til þess að þriðji maðurinn var handtekinn.

Þeim var boðið að tjá sig um sakarefnið í skipinu en gerðu það ekki. Þeim verður úthlutað verjendur þegar þeir eru komnir í land.

Má halda þeim í sólarhring án gæsluvarðhaldsúrskurðar

Halda má sakborningum án gæsluvarðhaldsúrskurðs í 24 klukkustundir. Það þýðir að sleppa verður skipverjunum tveimur sem handteknir voru í hádeginu í dag í hádeginu á morgun ef ekki verður farið fram á gæsluvarðhald yfir þeim. Þriðji maðurinn var handtekinn klukkan hálf níu í kvöld og má því halda honum þar til annað kvöld án gæsluvarðhaldsúrskurðar.

Vildi ekki svara því hvað kom lögreglunni á spor Polar Nanoq

Grímur sagði í samtali við Vísi fyrr í kvöld að hann gæti ekki farið út í það hvað kom lögreglunni á spor grænlenska togarans. Þá vildi hann ekki svara því hvort að annar hinna handteknu sé sá sem tók bílaleigubíl á leigu á föstudag en lögregla lagði hald á bílinn í Kópavogi um hádegisbil í gær.

Um er að ræða rauða Kia Rio-bifreið af eins gerð og þá sem sést á eftirlitsmyndavél við Laugaveg 31 klukkan 05:25. Á sama tíma og á sama stað hverfur Birna Brjánsdóttir sjónum.

Grímur sagði að lögreglan hafi enn ekki staðfest að það sé sami bíll og lagt var hald á í gær.

„Það er raunverulega ekki staðfest því við erum ekki með númerið á þeim bíl og það hefur enginn gefið sig fram sem var á þeim bíl,“ sagði Grímur.

Um hálftíma eftir að skipið lagðist við bryggju mátti sjá einn af sérsveitarmönnunum sem sigu niður í skipið úti á hafi um hádegisbilið í dag.