Laxveiðin hafin í Skotlandi

Laxveiðin á Íslandi byrjar fyrstu dagana í júní og geta veiðimenn líklega varla beðið eftir þeim degi en í SKotlandi er þó annað í gangi en veiði byrjaði á nokkrum svæðum fyrir tveimur dögum.

Meðal svæða þar sem veiði hófst eru svæði í ánni Ness og Portnacraig Pitlochry svæðið í Tay en þar hófst veiði 16. janúar.  Í Tay veiddust tveir vænir laxar og fleiri sáust en féllu ekki fyrir agni veiðimanna.  Í Ness veiddist einn lax fyrsta daginn en það var 23 punda hængur.  Hreistursýni voru tekin af laxinum áður en honum var sleppt og sýndu þau að hann hafði dvalið í ferskvatni í 3 ár og tvö ár í sjá.  Þar sýna árhringir sömuleiðis að laxinn hefur verið í góðu fæði í hafinum og vekur það vonir um að árið verði betra en síðasta sumar í skosku ánum en það sumar var víða eitt það lélegasta í manna minnum.  Veiðin í Skotlandi er síðan komin vel af stað í febrúar og mars sem er ólíkt því sem við eigum að venjast en margir íslenskir veiðimenn eru þó farnir að heimsækja Skotland til að kynnast ánum þar aðeins betur.

Veiði hefst á Íslandi 1. apríl þegar fyrstu sjóbirtingssvæðin og nokkur vötn opna fyrir veiðimönnum og það er ekki nema rétt tveir og hálfur mánuður þangað til.