Fjölbreytileiki er mikilvægur

ISS er eitt þriggja fyrstu fyrirtækja á Íslandi til að hljóta Jafnlaunavottun VR. Fyrirtækið hefur að leiðarljósi að árangur þess byggist á fjölbreytileika í stjórnun þar sem gildi og viðhorf beggja kynja komi fram. Fjölbreytta liðsheils þurfi til að stýra fyrirtækjum.

„ISS er virkilega stolt af því að vera eitt þriggja fyrstu fyrir­tækja á Íslandi til að hljóta Jafnlaunavottun VR, og við lítum á vottunina sem hluta af samfélagslegri ábyrgð fyrirtækisins,“ segir Björk Baldvinsdóttir, sviðsstjóri sölu- og viðskiptaþróunar hjá ISS. Hún hefur starfað hjá ISS í sautján ár og situr jafnframt í framkvæmdastjórn og framkvæmdaráði fyrir­tækisins.

„Það er eðlilegur hlutur í rekstri fyrirtækja að sýna starfsfólki þá virðingu að meta til jafns framlag þeirra óháð kyni,“ segir Björk en hjá ISS starfa 750 starfsmenn og þar af eru 70 prósent konur.

ISS er leiðandi í fasteigna­umsjón og býður upp á fjölbreytta þjónustu á fyrirtækjamarkaði. Til dæmis hádegisverðarþjónustu, ræstingar og fasteignaumsjón. „Markmið ISS er að vera fremsta þjónustufyrir­tæki á Íslandi,“ segir Björk og bendir á að í framtíðinni muni stjórnendur fyrirtækja leggja meiri áherslu á fasteignastjórnun.

„Við leggjum ávallt áherslu á að velja hæfasta fólkið í öll störf. Við höfum að leiðarljósi að árangur fyrirtækisins byggist á fjölbreytileika í stjórnun enda mikilvægt að gildi og viðhorf beggja kynja komi fram í stjórnun fyrirtækja,“ segir Björk sem telur að heimur viðskipta sé að breytast. „Hraði og flækjustig eru að aukast og þar með þarf fjölbreyttari liðsheild til að stýra fyrirtækjum. Ólík þekking, reynsla og hæfni leiða til aukinna skoðanaskipta, gagnrýnni umræðu og dýpri greiningar á málum, sem aftur leiða til betri ákvarðanatöku.“

Í framkvæmdaráði ISS er jafnt hlutfall kvenna og karla. Björk ráðleggur öllum fyrirtækjum að hafa það að markmiði að tryggja fjölbreytileika í stjórnun. „Það er margsannað að það leiðir til betri greiningar, árangursríkari ákvarðanatöku og því betri rekstrarárangurs fyrirtækisins.“