Skilríki Birnu um borð í Polar Nanoq

Skilríki Birnu Brjánsdóttur fundust um borð í grænlenska togaranum Polar Nanoq. Lík Birnu fannst í fjörunni við Selvogsvita í Ölfusi eftir hádegi á sunnudag en tveir skipverjar af togaranum sitja í gæsluvarðhaldi á Litla-Hrauni grunaðir um að bera ábyrgð á dauða Birnu. Þeir sæta einangrunarvist í fangelsinu.

Greint var frá því að skilríkin hefðu fundist í togaranum á vef DV í gærkvöldi. Í frétt á vef RÚV í morgun er einnig fjallað um málið en þar segir að skilríkin hafi fundist í ruslatunnu. Lögregla hefur ekki viljað staðfesta fundinn.

 

Yfirheyrslur fara fram á Litla-Hrauni í dag en ekki liggur fyrir hvort að báðir mennirnir verði yfirheyrðir eða aðeins annar þeirra. Þeir sitja í varðhaldi grunaðir um manndráp en lögreglan rannsakar nú þátt hvors mannsins fyrir sig í málinu.

„Þegar menn eru handteknir tveir þá er hluti af rannsókninni að upplýsa hvors um sig það liggur ekkert fyrir um það að aðild þeirra sé eins eða hún sé ekki eins. Þetta er bara til rannsóknar,“ sagði Grímur Grímsson, yfirlögregluþjónn sem stýrir rannsókninni, í samtali við Vísi í morgun.

Lögregla tjáir sig ekki um niðurstöðu úr bráðabirgðakrufningu á líki Birnu sem fór fram í gær og fæst dánarorsökin því ekki uppgefin.