Aflvélar fá Meyer umboðið

Aflvélar, Vesturhrauni 3 í Garðabæ, hafa fengið umboðið fyrir hinu þekkta bandaríska merki Meyer. Fyrirtækið afhenti nýlega Reykjavíkurflugvelli stærsta flugbrautarsóp landsins og hefur auk þess lagt í talsverða fjárfestingu til að auka gæði þjónustu sinnar.

Aflvélar sérhæfa sig í sumar- og vetrartækjum sem fest eru á gröfur, vörubíla og önnur farartæki. Fyrirtækið hefur umboð fyrir fjölmörg gæðamerki á borð við Aebi-Schmidt, Sami og Pronar. Nýverið bættist ein fjöður enn í hattinn þegar Aflvélar fengu umboðið fyrir Meyer.

„Meyer er þekkt bandarískt merki sem framleiðir snjótennur og saltdreifara framan á léttari ökutæki á borð við pallbíla og jeppa,“ lýsir Friðrik Ingi Friðriksson, eigandi Aflvéla. Hann segir merkið þekkt á Íslandi enda hafi tæki frá því verið í notkun hér í áratugi. „Menn hafa haft mjög góða reynslu af þessum tækjum sem notuð eru í minni verkefni,“ segir Friðrik Ingi en meðal þeirra sem nýta tæki frá Meyer eru Vegagerðin, ýmsir verktakar og bæjarfélög. „Við höfum fram til þessa fremur verið með stærri tæki svo þetta er mjög fín viðbót,“ segir Friðrik og bendir á vefsíðuna www.meyerproducts.com.

Stærsti flugbrautarsópur landsins

Aflvélar hafa selt flesta þá flugbrautarsópa sem eru í notkun á íslenskum flugvöllum. „Við vorum síðan að afgreiða mjög áhugavert tæki á dögunum en það er nýr flugbrautarsópur fyrir Reykjavíkurflugvöll. Þetta er stærsti flugbrautarsópur landsins sem er með bursta sem er 6,30 metrar á breidd.“

Friðrik Ingi lýsir því að venjulegir flugbrautarsópar séu dregnir af vörubílum. „Þessi sópur er hins vegar sambyggt tæki með liðstýringu þannig að hausinn hreyfist til hliðanna svipað og hjólaskófla. Þá er tönnin fremst og sópurinn fylgir á eftir. Þannig fær ökumaðurinn betra útsýni og á auðveldar með að stýra sópnum enda er hann miklu liprari í vinnslu.“ Sópurinn er líka afkastameiri en aðrir hefðbundnir sópar. „Þetta breytir miklu fyrir Reykjavíkurflugvöll. Sópurinn er það breiður að þeir geta sleppt heilli ferð á brautinni. Það sparar tíma og þar með peninga.“

Bætt þjónusta

Aflvélar hafa undanfarið lagt í mikla fjárfestingu til að bæta þjónustustig fyrirtækisins. „Við höfum stækkað mikið húsnæði okkar við Vesturhraun 3 í Garðabæ, og erum að setja upp alveg nýtt verkstæði. Aðstaðan er því miklu betri auk þess sem við höfum einnig bætt tækjakostinn til muna,“ lýsir hann. Friðrik Ingi segir þjónustuhlutann mikilvægan þátt í starfsemi Aflvéla. „Að vera með alla þjónustu innan fyrirtækisins breytir gríðarlega miklu fyrir okkur og kúnnann,“ segir hann en meðal viðskiptavina Aflvéla má nefna flugvelli landsins, Isavia, Vegagerðina, bæjarfélög og verktaka.

Nánari upplýsingar má finna á www.aflvelar.is