Engar yfirheyrslur fyrirhugaðar yfir helgina

Lögreglan býst ekki við að yfirheyra manninn, sem grunaður er um aðild að dauða Birnu Brjánsdóttur, yfir helgina. Þetta segir Grímur Grímsson yfirlögregluþjónn, sem stjórnar rannsókn málsins, í samtali við Vísi.

Maðurinn var úrskurðaður í tveggja vikna gæsluvarðhald og einangrun á fimmtudag vegna málsins og hefur ekki verið yfirheyrður síðan. Grímur segir lögreglu halda áfram að rannsaka allar hliðar málsins yfir helgina en staðan verði tekin á mánudag og þá tekin ákvörðun um frekari yfirheyrslur.

Birna hvar aðfaranótt laugardagsins 14. janúar síðastliðinn. Hún sást síðast á gangi við Laugaveg 31 klukkan 05:25 umrædda laugardagsnótt. Lík hennar fannst svo við Selvogsvita í Ölfusi átta dögum síðar, 22. janúar síðastliðinn.

Maðurinn sem sætir gæsluvarðhaldi og einangrun er sá sem lögregla telur að hafi ekið Kia Rio-bifreið í miðbæ Reykjavíkur um það leyti sem Birna hvarf.

Lögreglan hefur greint frá því að lífsýni sem fannst í bílnum sé úr Birnu og það sé staðfesting á því að hún hafi verið í bílnum.

Annar maður var í haldi vegna rannsóknar málsins en honum var sleppt úr haldi í gær eftir tveggja vikna einangrunarvist. Hann var leiddur fyrir dómara í Héraðsdómi Reykjaness á fimmtudag þar sem hann staðfesti þann framburð sem hann hafði gefið hjá lögreglu. Hann var ekki látinn sæta farbanni og fór til Nuuk á Grænlandi með áætlunarflugi Flugfélags Íslands síðastliðið fimmtudagskvöld.