Ólafía í sannkölluðum stjörnuráshóp

Hann er ekki amalegur félagsskapurinn sem Ólafía Þórunn Kristinsdóttir fær fyrstu tvo dagana á Bank of Hope Founders meistaramótinu en mótið er liður í LPGA-mótaröðinni.

Ólafía Þórunn mun spila með stórvinkonu sinni og frænku Tiger Woods, Cheyenne Woods, sem og Michelle Wie.

Wie er líklega þekktasta golfkona allra tíma en hún varð heimsfræg er hún lék á karlamóti í PGA-mótaröðinni aðeins 16 ára gömul.

Þetta er þriðja mótið sem Ólafía Þórunn tekur þátt í hjá LPGA en Wie er að spila á sínu 240. móti á mótaröðinni.

Þríeykið góða hefur leik í Phoenix klukkan 14.33 á morgun.

Mótið er í beinni á Golfstöðinni.