Stefán Karl sektaður meðan hann skrapp í geislameðferð

Stefán Karl Stefánsson leikari, sem hefur verið að berjast við mein, segir farir sínar ekki sléttar eftir að hafa farið í sína hefðbundnu meðferð.

„Fór í geislameðferð í morgun, eins og ég geri daglega, gleymdi símanum og var ekki með veskið svo ég hljóp bara inn enda tekur þetta um 20 mín. Ég passa þetta alltaf og hef gert frá upphafi. Kom út og þar biðu mín 10.000kr sekt. Minna má það ekki vera!“ skrifar Stefán Karl á Facebooksíðu sína.

Mikil gremja hefur brotist út á Facebooksíðu leikarans vinsæla en svo virðist sem háar sektargreiðslur Bifreiðasjóðs gangi fram af mörgum, þó löghlýðnir megi teljast. Stefán sjálfur bendir á ófremdarástand í bílastæðamálum borgarinnar, sem ekkert virðast batna þó menn greiði stöðugt meira í Bílastæðasjóð Reykjavíkurborgar:

„Það er ekki hægt að leggja fyrir utan LSH nema hálfur upp á stétt eða utan í umferðaeyjur, öll stæðin eru upptekin. Ég keyrði fjóra hringi um sjúkrahúsið og ekkert stæði var laust nema þetta, hálfur upp á eyju en ekki fyrir nokkrum manni.“

Fólk virðist því nauðbeygt til að brjóta reglur, fáir komast hjá því og þannig má segja að myndist veiðileyfi á borgara sem duglegir stöðumælaverðir nýta sér. Bílastæðasjóður var samkvæmt ársreikningi Reykjavíkurborgar fyrir árið 2015 með rúmlega milljarð í tekjur. Gjöld voru um 780 milljónir þannig að hagnaður af starfseminni það árið voru tæpar 240 milljónir.

Uppfært 14:40

Stefán Karl hefur nú tekið færslu sína út og greinir frá því á Facebooksíðu sinni, hvers vegna:

„Ég tók færsluna mína um stöðumælasektina út þar sem ég hef ekki áhuga á að verða að frétt hjá veftímaritum landsins og lesa mis ömurleg komment frá einstaklingum sem gera lítið annað en að svívirða mig og kalla illum nöfnum.“