Fögnuður braust út á Útvarpi Sögu þegar Pétur var sýknaður

„Til hamingju Pétur Gunnlaugsson! Til hamingju hlustendur Útvarps Sögu. Þetta er stór dagur. Þetta er sigur fyrir tjáningarfrelsið,“ sagði Arnþrúður Karlsdóttir útvarpsstjóri Útvarps Sögu.

Pétur Gunnlaugsson, útvarpsmaður og lögfræðingur, var sýknaður í héraðsdómi Reykjavíkur nú í morgun en hann var ákærður fyrir hatursorðræðu. Lögreglustjórinn á höfuðborgarsvæðinu gegn Pétri Gunnlaugssyni, en málatilbúnaðurinn tengist sérstakri baráttu lögreglunnar gegn hatursorðræðu en Eyrún Eyþórsdóttir stýrir sérstakri deild innan lögreglunnar sem rannsakar slík mál.

Pétur var sýknaður af öllum kröfum ákæruvaldsins en málið snérist um ummæli sem féllu í símatíma Útvarps Sögu en einkum var um að ræða ummæli sem snéru að samkynhneigðum en umræðan snérist um hinsegin kennslu í grunnskólum í Hafnarfirði. Pétur stýrði símatíma og var hann ákærður fyrir hatursorðræðu og útbreiðslu haturs með eigin ummælum og ummælum hlustenda. Ákvæði hegningarlaga sem var undir er 223. greina a: „Hafi ummælin falið í sér háð, rógburð og smámun á opinberum vettvangi í garð ótiltekins hóps manna hér á landi vegna kynhneigðar og kynvitundar þeirra.“

Fjölmiðlamenn bregðast tjáningarfrelsinu

Pétur fór yfir málið í útsendingu á Útvarpi Sögu ásamt Arnþrúði sem sagði meðal annars að málið hafi haft gríðarleg áhrif og hafi verið notað gegn þeim á Útvarpi Sögu. Hún vildi meina að þetta væri liður í atlögu gegn útvarpsstöðinni, meðal annars af hálfu einhverra embættismannagrúbba sem hafa hreiðrað um sig víða í stjórnkerfinu, þar sem þær fást við að skrifa skýrslur daginn út og inn og senda út um allar koppagrundir. Á því sé Stasí-bragur.

En dómurinn væri ánægjulegur fyrir alla sem láta sig tjáningarfrelsi einhverju varða. Meðal ýmislegs sem Pétur taldi athyglisvert í þessu máli er hversu blaðamenn og fjölmiðlar hafi brugðist við í þessu máli, þeir hafi ekki tekið málsstað tjáningarfrelsisins nema síður sé. Fremur að ráðist hafi verið á sig á þeim vettvangi, segir Pétur og nefndi RUV sérstaklega til sögunnar. Blaðamenn og fjölmiðlarnir hafi ekki tekið upp málsstað tjáningarfrelsisins. Ráðist hafi verið á sig í einhverjum skemmtiþætti þar, ef menn hafi ekki réttar skoðanir að mati RUV og þeirra sem þar vinna þá skiptir tjáningarfrelsið engu máli.

Tilraunalögfræði lögreglunnar

Vísir náði að ræða við Pétur rétt á milli útvarpsþátta. Hann segir að í dómnum sé fjallað um efni sem allir fjölmiðlamenn ættu að láta sig varða. Og taldi tvímælalaust um tímamótadóm að ræða, þetta væri í fyrsta skipti sem fjölmiðlamaður væri ákærður fyrir hatursorðræðu. Hann gerði síður ráð fyrir því að þessu yrði áfrýjað af hálfu ákæruvaldsins.

„Þetta er náttúrlega undarlegt fólk, að þau ætli að vera með þessa tilraunalögfræði áfram? Það væri náttúrlega algerlega ábyrgðarlaust. Ætlar lögreglustjórinn að vera á móti tjáningarfrelsinu eins og dómari lagði málið upp?“

Þá nefnir Pétur til sögunnar ýmis mannréttindasamtök sem rekin eru af hálfu ríkisins og borgarinnar, svo sem Mannréttindaskrifstofa Reykjavíkurborgar. Þar hafi ekki verið gefið mikið fyrir tjáningarfrelsið. „Hneyksli hvað er að gerast í landinu,“ sagði Pétur og var rokinn í næsta útvarpsþátt.