Nær allir sjúkraflutningamenn á Blönduósi hafa sagt upp störfum

Nær allir sjúkraflutningamenn hjá Heilbrigðisstofnun Norðurlands á Blönduósi hafa sagt upp störfum vegna vanefnda fjármála- og efnahagsráðuneytisins við að ljúka vinna við endurskoðun kjarasamninga. Uppsagnafrestur þeirra er einungis tuttugu og átta dagar þrátt fyrir margar ára starf.

Um miðjan desember 2015 undirrituðu samninganefndir Fjármála- og efnahagsráðuneytisins og Landssambands slökkviliðs og sjúkraflutningamanna samkomulag um breytingar á kjarasamningi sjúkraflutningamanna í hlutastarfi.

Með samningnum framlengdist gildandi kjarasamningur þessara aðila til 31. mars 2019 en á samningstímanum átti sérstök nefnd að vinna úttekt á störfum hlutastarfandi sjúkraflutningamanna þar sem þróun sjúkraflutninga síðastliðin fimmtán ár hefur verið með þeim hætti að fyrirkomulag ráðninga og kjara geti ekki verið með óbreyttum hætti miðað við þær kröfur sem gerðar eru í dag.

Nefnd sem fjármálaráðuneytið setti saman átti að vinna að skýrslu þar sem úttekt yrði gerð á umfangi og eðli sjúkraflutninga á þeim svæðum sem samningurinn næði til en nefndin hefur aldrei skilað niðurstöðum. Þessari vinnu átti að vera lokið fyrir fyrsta desember á síðasta ári og taka gildi um síðustu áramót.

Fimm af sjö hlutastarfandi sjúkraflutningamanna á Blönduósi hafa þegar sagt starfi sínu lausu vegna vanefnda ríkisins og er Þórður Pálsson er einn þeirra.

Hvers vegna grípið þið til þessara aðgerða núna?

„Aðallega vegna mikillar óánægju með laun og vegna svikinna loforða. Því sem að búið var að semja um. Í fyrsta lagi erum við í raun ekki með kjarasamning. Það er bara samkomulag við fjármálaráðherra um hvernig okkar kjör eiga að vera,“ segir Þórður.

Nokkuð ítarlega er farið yfir hvernig vinna nefndarinnar átti að fara fram í sérstakri bókun í samkomulaginu er markmiðið með þeim breytingum sem samningsaðilar vildu ná fram var meðal annars að sjúkraflutningamenn í hlutastarfi myndu njóta hliðstæðra kjara og réttinda og aðrir starfsmenn ríkisins.

Í lok janúar síðastliðinn lýsti Landssamband slökkviliðs og sjúkraflutningamanna yfir vonbrigðum sínum með þær tafir sem orðið hafa á vinnu Fjármála- og efnahagsráðuneytisins.

Valdimar Leó Friðriksson er framkvæmdastjóri Landssambands slökkviliðs- og sjúkraflutningamanna.

„Við erum búnir að vera að reka á eftir ráðuneytinu meira og minna í heilt ár. Sent þeim bæði formleg bréf, munnlega, tölvupóstar og annað,“ segir Valdimar.

„Það bara gengur því miður andskotann ekki neitt. Það versta er að ráðuneytin eru svolítið að velta þessu á milli sín. Fjármálaráðuneytið vill meina að heilbrigðisráðuneytið eigi að leysa þetta, en þeir hafa aldrei ansað því. Þetta er svona einhvern veginn að falla á milli þar, því miður.“

Valdimar segir að í dag sé starfsframlag hlutastarfandi sjúkraflutningamanna metið í tímakaupi og þar með eru bakvaktalaun þeirra skert um 50%, veikindarétt um 60% og uppsagnarfrest um 70% sem þýðir að uppsagnarfrestur beggja aðila er aðeins 28 dagar.

„Ég væri ekkert hissa þó það færu að koma uppsagnir annarsstaðar. Eins og ég hef sagt áður erum við búnir að vera að vara menn við í 24 mánuði. Það er ekkert mjög vinsælt að vera sjúkraflutningamaður í hlutastarfi og þurfa að hlaupa fyrirvaralaust og úr sinni aðalvinnu og um miðjar nætur og um helgar, fyrir þessi, leyfi ég mér að segja, skítalaun sem eru í boði.“