Hermenn fengnir til aðstoðar

Ekkert lát er á mótmælunum í Venesúela og hafa stjórnvöld ákveðið að senda hermenn í vesturhluta landsins til þess að reyna að stemma stigu við þau. Fjörutíu og þrír hafa týnt lífi í mótmælunum sem nú hafa staðið yfir í sex vikur samfleytt.

Varnarmálaráðherra landsins, Vladimír Padrino Lopez, greindi frá því í sjónvarpsviðtali í dag að um væri að ræða á þriðja þúsund hermenn sem verði sendir til Tachira, sem er við landamæri Kólumbíu, en að þar sé mikið um ofbeldi, innbrot og þjófnaði.

Mótmæli hafa geisað í Venesúela um árabil, en þess er krafist að Nicolas Maduro, forseti landsins, fari frá völdum. Hann er sakaður um einræðistilburði og að hafa valdið bæði pólitískri og efnahagslegri kreppu í landinu. Maduro hefur hins vegar lýst því yfir að hann muni sitja út kjörtímabilið.