Plastpokarnir virðast á útleið

Verulega hefur dregið úr sölu plastpoka á Íslandi undanfarna mánuði, allt upp í tuttugu prósent í sumum verslunum.

Þetta segir Björn Jóhannsson, framkvæmdastjóri Umhverfissjóðs verslunarinnar – Pokasjóðs. Dregið hafi úr sölunni jafnt og þétt síðustu ár en nýverið hafi samdrátturinn verið hraðari.

Björn segir að samkvæmt útreikningum Pokasjóðs hafi nærri milljón fjölnota poka selst á síðastliðnu ári. Þrátt fyrir það hafi samdráttur í sölu plastpoka ekki verið til jafns við þróunina í nágrannalöndunum.

Íslendingar virðist þó vera að taka við sér og séu verslanakeðjur búnar að selja fleiri merkta fjölnotapoka undanfarið. Til að mynda hafi verið seldir rúmlega 300.000 fjölnotapokar með merki Bónuss.