Hjörvar um ummæli Damir: Alls konar menn fóru að skyndilega að hreyfa sig

Damir Muminovic, varnarmaður Breiðabliks, lýsti í gær ánægju sinni með æfingar Breiðabliks eftir að Milos Milojevic tók við Blikum í síðustu viku.

Hann ræddi þá við blaðamann íþróttadeildar eftir 2-1 sigur Breiðabliks og hafði orð á því að menn leggi sig 100 prósent fram á æfingum Milosar.

„Sem var ekki mikið áður,“ sagði Damir en viðtalið við hann má sjá í fréttinni hér fyrir ofan.

Hjörvar Hafliðason sagði ummælin áhugaverð í Pepsi-mörkunum á Stöð 2 Sport í gær.

„Hann er með létt skot á Arnar Grétarsson þar sem hann kvartar undan tempólausum æfingum hjá honum,“ sagði Hjörvar.

„Á mínum mislukkaða fótboltaferli lenti ég reglulega í þjálfaraskiptum á miðju tímabili. Fyrstu 2-3 vikurnar hjá nýjum þjálfara varð allt vitlaust og ótrúlegustu  menn sem höfðu ekki hreyft sig á æfingum voru skyndilega byrjaðir að gera það.“

„Ég held að Damir ætti að læra það að þetta er alltaf svona fyrstu vikurnar hjá nýjum þjálfara.“